Квез чидани?

.  Муькуь континентрилай тафаватлу яз, Австралия тамамдиз анжах са уьлкведикай ибарат я.

.  Австралия масанра гьалт тийидай хьтин надир затIар авай ажайиб континент я.

.  Майдандин екевилел гьалтайла, Австралия дуьньядин уьлквейрин жергеда ру­гуд лагьай чкадал (7 млн кв. метр) ала.

.  Чкадин сифтегьан халкьар ина 50 агъзур йис идалай вилик пайда хьанваз гьисабзава.

.  Австралияда къецепатан жуьреба-жуьре уьлквейрай атанвай ксарин кьадар гзаф ава. Эхиримжи делилралди, Австралияда яшамиш жезвай агьалийрин 28,5 процент маса уьлквейра ханвайбур я. Асул гьисабдай Австралиядиз Великобританиядай, Индиядай, ЦIийи Зеландиядай, Китайдай агьалияр куьч жезва.

.  Къанунрал амал авунал гьалтайла, Австралиядин агьалияр дуьньяда сад лагьай чкадал алаз гьисабзава.

.  Халкьдин сигъвилел гьалтайла, Австралия дуьньяда 193-чкадал ала. Ина са­ки пуд касдал са квадратдин километр­дин мулк гьалтзава. Гекъигун патал фикир гайитIа, Монакода18 агъзур касдал са квадратдин километрдин мулк гьалтзава.

.  Австралиядин са пай агьалияр (12 млн кас) пуд чIехи шегьерда яшамиш жезва – Мельбурнда, Сиднейда ва Брисбенда­.

.  Австралиядин мулкар Великобританиядин мулкарилай 32 сеферда чIехи я.

.  Австралиядин меркез Канберра шегьер я. И шегьер меркез арадал гъун патал махсусдаказ 1913-йисуз эцигна.

.  И материкда яшамиш жезвай халкьар 300-далайни гзаф чIаларал рахазва, абурукай 45 чIал бинелу халкьаринбур я.

.  Австралиядиз дуьньядин спортдин меркез чIангьакьа лугьузвач. Гьакъикъатда­ни, анин агьалийрикай 70 процентди­ спортдин мярекатра гьич тахьайтIа гьаф­те­­да сад­ра иштиракзава. Мягьтел жедай де­лил ам я хьи, спорт ва сагълам тIуьн машгьурзавай уьлкве ятIани, анин гзаф агьалияр артухан заланвили гьелекзава.

.  Австралия дишегьлийриз сечкийра иштиракдай ихтиярар гайи кьвед лагьай уьлкве я. И кар 1902-йисуз хьана.

.  Эгер 18 йис тамам хьанвай ватан­дашди сес гунин сечкийра иштиракуникай­ ва я халкьдин переписдикай кьил къакъу­дай­тIа, адал пулунин жерме илитIзава.

.  Австралия дуьньяда лап хъсан гьава авай чкайрикай яз гьисабзава.

.  Дуьньядиз провод галачир интер­нет­ Австралиядин илимдин агентстводи­ пиш­кеш­на. Са бязи чешмейри тестикьарзавай­­вал, и кар 1998-йисуз кьиле фена. А чIа­ва­лай инихъ Австралияди лицензия авачиз Wi-fi ишлемишзавай тешкилат­рихъ галаз къастуналди суд-дуван ийизва.

.  Виктория штатда канвай лампа дегишардай ихтияр анжах лицензия авай электрикриз ава.

.  Кенгурудин як Австралиядин агьалийри са акьван рикI алаз незвач. Австралиядай кенгурудин якIун чIехи пай дуьньядин 55 уьлкведиз ракъурзава.

«Лезги газет»