“Дербент шегьер” ГО-дин кьил Хизри Абакарова муниципалитетдин алай вахтунин месэлаяр гьялуниз талукьарнавай совещание кьиле тухвана. Идан гьакъиндай “Лезги газетдиз” шегьердин администрациядин пресс-къуллугъди хабар гана.
— Шегьерэгьлийрилай жуьреба-жуьре месэлайрай зи тIварцIихъ лап гзаф кьадар арзаяр къвезва. Гьа са вахтунда агьалияр инжиклу ийизвай, чпин везифаяр дуьздаказ кьилиз акъуд тийизвай чиновникрин, ришветбазрин тIварар яхъ лагьайла, инсанри кьил къакъудзава. Эгер делилар авачтIа, тIвар кьазвачтIа, чна серенжемар гьикI кьабулдайди я? — лагьана Х.Абакарова. — Гьар садаз чир хьун лазим я, инлай кьулухъ чна коррупциядихъ галаз алакъалу тахсиркарвилер, чпин везифаяр намуслувилелди кьилиз акъуд тийизвайбур такурдай кьадач.
Шегьердин кьил “ВКХ” МУП-да арадал атанвай гьаларал гегьеншдиз акъвазна. Алай вахтунда и МУП шегьерэгьлияр хъвадай целди таъминарзавай са идара я ва ам кьилдин касдин гъиле туна кIандач.
— Ихьтин кар авуртIа, ам чаз къвезмай несилри багъишламишдач, — къейдна Х.Абакарова. — Кархана банкротдиз элкъуьриз кIанзавай гьерекат акъвазарна кIанда. Адал алай буржар (абурни электроэнергия ишлемишунай я) вахкудай серенжемарни чна кьабулда.
Администрациядин балансдал гьуьлуьн къерехни (набережная) хъивегьун лазим я. Анаг чна шегьерэгьлийри ва мугьманри ял ядай вижевай чкадиз элкъуьрда. Шегьердин итижар патал “Ирид риваятдин минара” комплексни ишлемишун лазим я. Комплекс ишлемишуниз талукь фикиррин теклифрин конкурс малумарна кIанда.
Хизри Абакарован гафаралди, комплекс музей хьиз ишлемишда ва ина тIвар-ван авай артистар халкьдин вилик экъечIдай сегьне ачухда. Идан гьакъиндай чпин фикирар тендерда иштиракдай бизнесменрини лугьун лазим я. Низами Генжевидин паркни аваданламишуниз талукь конкурсни малумарун герек я. Аквазвайвал, Дербент шегьердин агьалийрин кьадар гзаф жезва. Аваданламишунин месэлаяр гьялдайла, и кардизни фикир гана кIанда.
Совещанидал начагъзавай инсанриз инвалидвал тайинарунин месэлани къарагъарна. ГьикI лагьайтIа, ахьтинбуруз набутвал гунин карда тахсиркарвилериз рехъ гузва.
Администрациядин кьили мадни хабар гайивал, ноябрдин вацра Сулейман Керимова налогрин пул яз шегьер патал 1,5 миллиард манат чара ийизва. Амма кардик квай законрин бинедаллаз, шегьердин администрациядиз 16 процент, амайди республикадин бюджетдиз жезва. Дагъустан Республикадин Кьиливай шегьердиз ахъайзавай вири пул Дербентда амукьдайвал авун тIалабиз кIанзава. ТахьайтIа, шегьерда кIватI хьанвай кьван важиблу месэлаяр галай-галайвал гьялиз жедач.
Гъилиз къвезвай пулар сифте нубатда квез харждатIа чирун патал, шегьердин майишат вири рекьерай экспертиза авуна кIанда. Дербентдиз исятда аялрин хъсан бахчаяр, школаяр кIанзава. “Аэропорт”, “Аваины” ва маса микрорайонар къайдадиз гъунни алай йикъан истемишун я.
— Садани умуд кутамир хьи, Сулейман Керимован пулар къведа ва, суьгьуьрчидин тIвал галукьайди хьиз, шегьер гуьрчег жеда. Сад лагьайди, пулар харжунал кIевелай гуьзчивал авун герек я, кьвед лагьайдини, шегьерда гъиле кьазвай цIийи крар уьмуьрдиз кечирмишдайла садни къерехда акъвазна кIандач. Анжах вирида, сад хьана, зегьмет чIугурла, хъсанвилихъ дегишвилер жеда, тахьайтIа, вири гьакI авайвал амукьда, — лагьана Хизри Абакарова.
Совещанидал гъанвай месэлаяр веревирд ийидайла, чпин фикирар УЖКХ-дин начальник Салигь Рамазанова, контрольно-счетный палатадин председатель Маил Ибрамхалилова ва шегьердин прокурор Сабир Къазиагьмедова лагьана.
«Лезги газет»
