“Лезги газетдиз” Мегьарамдхуьруьн райондин администрациядин пресс-къуллугъди хабар гайивал, 22-октябрдиз райондин кьил Фарид Агьмедова Гилийрин хуьряй тир багъманчи Фейзудин Ибрагьимовав шадвилин гьалара “Золотой фонд регионов” орден вахкана. Ф.Агьмедова къейд авурвал, Ф.Ибрагьимова хуьруьн майишатдин хиле хъсан агалкьунар къазанмишзава, районда и хел вилик тухун патал кьабулнавай программадин сергьятра аваз, ада лезги чилел битмишарзавай, еридиз хъсан суьрсет Урусатдин базаррив агакьарзава. Райондин кьили гьакIни зегьметкешдихъ мадни еке агалкьунар ва хъсан бегьерар хьун алхишна.
Къейд ийин хьи, мукьвара Краснодарда “Перспектива-2018” лишандик кваз кьиле фейи бизнес-форумдал Мегьарамдхуьруьн райондай тир багъманчи и ордендиз лайихлу хьанвайди малумарнай. И мярекатда Россиядин ва Къазахстандин 20 региондай атанвай гьукумдин органрин, гъвечIи ва юкьван карчивилин векилри иштиракзавай.
Лагьана кIанда, Ф.Ибрагьимов 1997-йисалай ичер, чуьхверар ва хутар битмишарунал машгъул жезва. Алай вахтунда адахъ 60 гектардин майданда экIя хьанвай интенсивный ва суперинтенсивный жуьредин багълар ава. Анай зегьметкешди 80 тонндив агакьна емишар кIватI хъийизва.
“Хуьруьн майишат вилик тухун патал чи республикада къулай вири шартIар ава — хъсан чил ва вижевай гьава. Чна кIватI хъийизвай бегьердихъни базарда хъсан къимет ава”, — лугьузва багъдин вири сирер чизвай багъманчиди.
«Лезги газет»
