14-октябрдиз Мамедкъала поселокдин стадиондал Дербент район арадал атана 96 йис тамам хьуниз талукьарнавай мярекатар кьиле фена. Райондин йикъан сергьятра аваз ина гьакlни азербайжанрин культурадин республикадин дережадин “Севиндж” фестиваль ва “Къизилдин зул” суварни къейдна.
Шад мярекатра Кьиблепатан территориальный округда РД-дин Кьилин патай тамам ихтиярар ганвай векил Энрик Муслимова, вахтуналди РД-дин Гьукуматдин Председателдин заместителдин везифаяр тамамарзавай Билал Омарова, вахтуналди РД-дин хуьруьн майишатдин ва суьрсетдин министрдин везифаяр тамамарзавай Керимхан Абасова, РД-дин Халкьдин Собранидин депутатар Ферзиллагь Исламова, Асият Алиевади са бязи министерствойрин руководителри, Сулейман-Стальский, Мегьарамдхуьруьн, Ахцегь ва маса муниципалитетрин кьилери, райондин вири хуьрерин ва къунши районрай атанвай агьалийри иштиракна
Мярекатдиз Дербент райондин агрофирмайри чпи гьасилзавай няметар гъанвай. Ина булдалди салан майваяр ва емишар, са шумуд жуьре сортарин ципицIар ва гьакlни райондин чехирар хкуддай заводдин продукция авай.
Стадиондал райондин хуьрерин ва шегьердин 29 гьаят тешкилнавай. Гьар гьаятдал вичин музыкантар, недай- хъвадайбур гьазурдайбур гьерекатдик квай.
Мярекатрин шадвилер райондин вири идарайрин ва хуьрерин яратмишзавай, образованидин, медицинадин коллективрин, хуьруьн майишатдин работникрин параддилай башламишна.
Кlватl хьанвайбуруз сувар тебрикуналди, райондин кьил Мегьамед Желилова Дербент район девлетлу адетралди ва зегьметдал рикl алай баркаллу инсанралди машгьур тирди къейдна. Райондин руьгьдин къуват яз ада миллетрин арада авай дуствал ва бубайрин адетриз вафалувал къалурна. Ахпа ам райондин агропромышленный комплексдин агалкьунрал акъвазна. Икl, алай йисуз районда 52 агъзур тонн ракъинин кагьрабаяр, 22 агъзур тонн техил, саки 370 агъзур тонн салан майваяр, 14 агъзур тонн емишар, 3 агъзур тонн як, 9 агъзур тонн нек, алатай йисав гекъигайла 100 миллион манатдин артух продукция гьасилнава.
Билал Омарова Дагъустан Республикадин Кьилин везифаяр вахтуналди тамамарзавай Владимир Васильеван патай райондин агьалийриз пуд сувар мубаракна, район йигин камаралди вилик физвайди къейдна ва хуьруьн майишатдин работникриз чlехи агалкьунар къазанмишун алхишна.
— Гьуьрметлу Дербент райондин агьалияр ва хуьруьн майишатдин зегьметчияр, за квез къе районда къейдзавай пуд суварни мубаракзава, — лагьана Энрик Муслимова. — Дербент район республикада виридалайни чlехибурукай сад я. Ина хуьруьн майишат хъсан ериш аваз вилик физва. Заз инал виридаз чешне тир “Татляр” агрохолдингдин ва адан руководитель Ягья Гьажиеван тlвар кьаз кlанзава.
Анал районэгьлийриз сувар гьакlни Керимхан Абасова, Асият Алиевади, Дагъустандин дишегьлийрин Союздин председатель Интизар Мамутаевади ва масабуру тебрикна.
Ахпа районда тафаватлу хьайи хуьруьн майишатдин, образованидин, медицинадин, культурадин са жерге работникрив Россиядин Федерациядин, Дагъустан Республикадин, РД-дин хуьруьн майишатдин ва суьрсетдин министерстводин патай гьуьрметдин тlварарин удостоверенияр, гьуьрметдин грамотаяр, чухсагъулдин чарар вахкана.
Къейдна кlанда, “Севиндж” фестиваль рикlел аламукьдайди хьана. И мярекатда Дагъустандин Гьукуматдин лезгийрин, азербайжанрин, табасаранрин театррин коллективри, Дербентдин музыкальный училищеди, Дагъустандин кьуьлердай “Каспий” ансамблди, Республикадин циркинин искусстводин школади, фольклордин “Терекеме” ансамблди ва масабуру иштиракна.
Фестиваль, РД-дин культурадин министрестводи ва республикадин халкьдин Яратмишунрин кlвали къуьн кутуналди, райондин администрацияди ва культурадин отделди тешкилна.
Къагьриман Ибрагьимов
