Зи вилик Кьасумхуьрел акъатзавай “Куьредин ярар” журналдин алай йисан 4(8)-нумра ква. Са-са чар ачухиз, зун адахъ галаз таниш жезва. 12-чина чапнавай материалди зи фикир вичел желбна. Ам 1990-йисан 10-январдиз “Коммунист” газетдиз акъатай зи “Вун зи намус я, дидед чIал” макъаладай къачунвай са чIук я. Анжах адан кIаникай автор яз зи ваъ, Сулейман-Стальский райондин ЦIийи Макьарин хуьруьн мектебдин муаллим Рабият Мансуровадин тIвар кхьенва. И месэладай кьил акъудун патал зун журналдин редактор Агьмедпаша Агьмедпашаевахъ галаз алакъадиз экъечIна. Ада заз Мегьарамдхуьре кьиле фидай Сулейман-Стальский ва Мегьарамдхуьруьн районрин яратмишдай интеллигенциядин векилрин саналди тир мярекатдиз атун теклифна. Аниз фидайла за 1990-йисан зи макъала авай газет ва 6-7-классрин лезги чIалан ктаб тухвана.
И ктаб тухунихъни себеб авачиз тушир. Кар анал алай хьи, ктабдин 4-чина авай 2-тапшуругъда зи макъала ганвай. Гьанани автор зун тирди къейднавачир, гьакI “Г” (газетрай) кхьенва.
Лагьана кIанда, и ктаб акъатдалди вилик зи патав рагьметлу Гьахъверди Рамалданов атана. Ада, гьайиф чIугунивди, ктабда гьатзавай макъаладин кIаникай зи тIвар кхьиз тежезвайдан гъавурда туна.
— Учебникар газетар туш, — лугьузвай ада. — Газетра нин хьайитIани тIварар кьаз жеда, амма учебникра — ваъ. Учебникра анжах шаирринни гьикаятчийрин тIварар кьазва.
Гьахъверди Рамалданов, ктабдик кутазвай зи макъала “Газетрай” къул алаз чапдай ихтияр къачуз, зи патав атана, захъ галаз меслят авуна, гьатта гъил къачунни тIалабнай…
Яратмишдайбурун мярекатдал за кьвед лагьай сеферда Агьмедпаша Агьмедпашаеваз адан къаюмвилик кваз акъатзавай журналда зи макъаладин автор масад яз къалурнавайдакай хабар гана ва гъалатI туькIуьр хъувун тIалабна. Адани чун килиг хъийида лагьана гаф гана.
За умуд атIанач. Белки, фикирна за, “Куьредин ярар” журналдин нубатдин нумрада гъалатI туькIуьр хъийин. Мадни башкъа, автор масад яз къалуруналди, журналдин редакцияди СМИ-рин закон, автордин ихтиярар чIурнавай.
Нубатдин нумра вилив хуьз варцар алатна. Эхирни 14-сентябрдиз зал журналдин цIийи нумра агакьна. 16-чина “ГъалатI туькIуьр хъувунва” кьил гана текст чапнава, амма макъаладин автор зун тирдакай са гафни лагьанвач. Кардай кьил акъудун патал за Агьмедпаша Агьмедпашаеваз мад сеферда зенгна. Ада зун, им компьютердин гъалатI я лагьана, секинарна.
“Куьредин ярар” журналди зи макъаладин жигьетдай гьакъикъат арадал хкидайдак за умудар кутазмач. Автордин ихтиярар чIурнавай дуьшуьшра, СМИ-рин къанунрал асаслу яз, опровержение хгана кIанзавайди я. Вични журналдин редакцияди авунвай къайдада ваъ, къанунди истемишзавайвал.
Гьакъикъат арадал хкун патал зун жуван кьилел атай агьвалатдикай «Лезги газетдиз» кхьидай фикирдал атана. Рабият Мансуровади, чиз-чиз, зи макъаладай къачунвай чIук вичин тIвар алаз журналда чап авун кутугнавачир. “Куьредин ярар” журналдин редактор Агьмедпаша Агьмедпашаевни и месэладив и къайдада эгечIна хъсан хьанач. За “Лезги газетдин” чинрилай и месэладин патахъай Рабият муаллимдин жаваб сабурсузвилелди вилив хуьзва.
Фазила Абасова, муаллим, публицист
