Эхиримжи йисара “Лезги газет” почтадай ва киоскрай кхьизвай агьалийрин кьадар гьа са дережада ава — 9-10 агъзур. Ибур гьар йисан гьакъикъи подписчикар я, амма милли газет кIелзавайбурун кьадар идалай 2-3 сеферда гзаф я. Газетдихъ галаз алакъа хуьзвай ксарни тIимил туш. Абуру редакциядиз ара-ара маналу чарар кхьизва, макъалаяр рекье твазва.
И йикъара Дагъустандин Огни шегьердай Ибрагьимов Вердидилай пара итижлу ва метлеблу чар атана. Сифте кIелиз гатIунайла, чун гъавурдани акьунач, ада лугьузвай дуст вуж ятIа, ихтилат никай физватIа? Анжах ахпа, чарчин юкьвал агакьайла, гьакъикъат ачух хьана. В.Ибрагьимован дуст “Лезги газет” я кьван.
“Салам, чIехи дуст!
Вун залай пара чIехи я, ваз дуьнья гзаф акунва, тежрибани вахъ хейлин ава. Гьавиляй заз вун гзаф кIанда. Вучиз лагьайтIа, дуст, вуна са заз ваъ, гзафбуруз зурба акьул, сабур гузва, гьакI маса къени рекьерни къалурзава. И кIвалах, фикир гайитIа, сергьят авачир кьван камаллуди, разивалдайди я.
Къе-пака вун виш йисан дережадив агакьда. Им зун ва амай ви дустар патал зурба вакъиа жеда. Ам тир гьалда къаршиламишни авуна кIанда.
ЧIехи дуст, заз малум я, алатай девирда вал жуьреба-жуьре тIварар хьана. Уьмуьрда вал четин вахтарни ацалтна. ГьикI хьанатIани, вуна баркаллувилелди ви рехъ тухвана, халкьдиз къуллугъна. Аферин!
Къе вал, чIехи дуст, “Лезги газет” тIвар ала. За ваз ам рикIин сидкьидай тебрикзава. Къуй дуст, ваз и ватанперес тIвар асирралди ишлемишдай сагъвал гурай. Лезги халкьни галаз чна вал гьамиша дамахда.
Багьа дуст, зун вахъ галаз 1964-йисалай таниш я, заз вун пара хуш я. Вун за рикI алай багьа мугьман хьиз кьабулзава, гзафбуруз вун играми я.
Дагъустандин Огни шегьерда милли газет кхьизвайбур тIимил хьунал за бейкефвалзава. Жуван мукьвабурув, чидайбурув, къуншийрив вун кхьиз тун патал за гьар йисуз таблигъат тухузва. Са вахтарив гекъигайла, газет кхьизвайбур са тIимил артух хьанва. Гьайиф хьи, чи са бязи ватандашриз газетди гузвай куьмекдикай, лезетдикай хабар авач. Газет рикIин дуст хьиз я. Хабарни авачиз са гьи рекьяй ятIани кIелзавайдаз куьмек гузва. За жуван вири ватандашриз дидед чIалал акъатзавай газет кхьиниз эвер гузва”.
