Алай йисуз Дагъустанда, алатай йисан гьа и вахтунив гекъигайла, маса къачузвай хуьруьн майишатдин техникадин кьадар 3 сеферда артух хьанва, хабар гузва РД-дин хуьруьн майишатдин ва недай суьрсетдин министерстводи.
Идарадин векилдин гафаралди, алай йисан ирид вацра республикадин хуьруьн майишатдин суьрсет гьасилзавайбуру 322 миллион манатдин къимет авай 223 машин — хуьруьн майишатдин техника маса къачунва. Алатай йисан нетижайрив гекъигайла, маса къачунвай тракторрин ва комбайнийрин кьадар кьве сеферда гзаф я.
Маса къачузвай техникадин кьадар гзаф хьунал, хабар гузвайвал, хуьруьн майишатдин суьрсет гьасилзавайбурун патай итиж артухарунихъ элкъуьрнавай, государстводин патай куьмек тIем акакьдайди авун патал республикадин руководстводи кьиле тухузвай кIвалахдин нетижайри гъана.
“Росагролизинг” АО-дихъ галаз алакъада аваз кIвалах кардик кутунва, юкьван жуьредин майишатри техника “Дагснаб” АО-дин куьмекдалди маса къачузва, чIехи майишатри лагьайтIа, арада кас авачиз кутIуннавай икьраррин бинедаллаз кIвалахзава.
И серенжемрин нетижада 192 миллион манатдин (вири кьадардин 60 процент) техника майишатри маса гунин-къачунин икьраррин бинедаллаз ва 129 миллион манатдинди – лизингдин икьраррин бинедаллаз маса къачунва.
Чи мухбир
