Дагъустандин лежберри фад дигмиш жедай техилдин бегьер кIватIна куьтягьнава. Бегьердин санлай къачур кьадар 206,2 агъзур тонндиз барабар я, са гектардай юкьван гьисабдалди 22 центнер техил кIватIнава, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.
“Дагъустанда зулун магьсулрин бегьер. Алай йисуз тIебиатдин гьалар са акьван кутугайбур туширтIани (марфар тIимил къвана), Дагъустандин магьсулдарривай хъсан нетижайрив агакьариз хьанва. ИкI, 93,8 агъзур гектардин майданрай 206,2 агъзур тонн кьил кьадай жуьредин техилар кIватIнава”, — лугьузва малуматда.
Къейдзавайвал, зулун магьсулрин бегьердин са паюнилай гзаф республикадин вад районда кIватIнава: Хасавюрт районда — 38,7 агъзур тонн, Къарабудахкент — 24,7 агъзур тонн, Ногъай — тахминан 20,4 агъзур тонн ва Къизляр — 20,3 агъзур тонндилай виниз.
Дагъустандин 2020-йисан бегьердин сечме фу гьазуруник виле акьадай хьтин пай гатфарин магьсулрини кутада. Гьажибугъдаяр, прунз ва кьил гъидай магьсулар цанвай вири чилер фикирда кьурла, гатфарин магьсулрин умуми майдан 156,5 агъзур гектардиз барабар я”, — алава хъувуна министерстводин пресс-къуллугъди.
«Лезги газет»
