Дагъустанда прунз кIватI хъувунин кIвалах давам жезва. Къенин йикъалди и набататдин бегьер 17 агъзурни 207 гектардин майдандай вахчунва. Са гектар чилелай юкьван гьисабдалди 44 центнер прунз кIватIзава, санлай къачур кьадар 75 агъзурни 642 тоннадиз барабар я. Им, 2016-йисан гьа и вахтунин нетижайрив гекъигайла, 13,5 агъзур тонндин гзаф я.
Кьилди къачуртIа, 40 агъзурни 574 тонн прунз Къизляр райондин хуьруьн майишатдин суьрсет гьасилзавайбуру кIватIнава.
РикIел хкин, алай йисуз республикадин лежберри прунз 19 агъзурни 460 гектардай яни алатай йисандалай 1 агъзурни 200 гектардин чIехи майдандай кIватIун лазим я.
Алава хъийин, 2012-йисав гекъигайла, республикада гьасилзавай прунздин кьадар 2,6 сеферда, прунз цадай лакари кьунвай майданрин кьадар 9,5 агъзур гектардилай 18 агъзур гектардал агакьдалди артух хьанва.
Алатай йисуз регионда тахминан 80 агъзур тонн дуьгуь гьасилнай, и набататди кьунвай майданар 18 агъзур гектардилай гзаф тир. 2017-2019-йисара республикада икьван чIавалди кардик квачир мад 1 агъзур гектар лакар прунз цун патал ишлемишиз башламишда.
Чи мухбир
