«Гьялна кIанзавай четин месэлаяр авани? Я туштIа, кIвалах хъсанардай теклифар? Куьмек гунин ва тереф хуьнин лазимвал авани? Профсоюздик экечI! Ви ихтияррин гьакъиндай къайгъударвал профсоюздин хиве тур! Чахъ галаз хьайитIа, вахъ жеда: пакадин йикъахъ инанмишвал, кIвалахдалди таъминарзавайдан къарарриз, къанундин сергьятра аваз, таъсирдай мумкинвал, жуван ихтиярар ва итижар хуьнин карда са фикирдал алай терефдарар». Ихьтин эвер гунралди республикадин агропромышленный комплексдин профсоюзди вичин жергейриз АПК-дин хиле кIвалахзавай, хуьруьн майишатдин производстводихъ галаз алакъалу карханайрин векилар желбзава. Виликдай машгьурвал екеди тир, амма эхиримжи йисара саки михьиз квахьунин сергьятдиз мукьва хьанвай профсоюзрин гьерекатар гуьнгуьна хтунин метлеблувиликай РД-дин агропромышленный комплексдин работникрин профсоюздин председатель Муртазали Муртазалиева «Лезги газетдин» майдандал СМИ-рин векилрихъ галаз гуьруьш хьайи вахтунда суьгьбетна.
Дагъустандин агропромышленный комплекс республикадин экономикадин асул хилерикай сад я. Ада региондин валовый продуктдин 22 процент тешкилзава. Санлай къачурла, республикадин АПК-дин хиле 12 агъзур кархана кардик ква ва тахминан 300 агъзур касди (абурун 57,7 процент хуьруьн чкайрин агьалияр я) зегьмет чIугвазва. Гьа са вахтунда, Муртазали Бибалаевича пашманвилелди къейд авурвал, АПК-дин профсоюздик абурун анжах 1 процентдиз барабар кьадар работникар ква. «Зи фикирдалди, инсанриз чпихъ авай мумкинвилерикай хабар авач. Абуруз чизвач профсоюздик экечIуни чпин уьмуьрдиз хъсан патахъай таъсирдайди…», — лагьана, ада тешкилатдин кIвалахда гьалтзавай дуьшуьшрикай, чпи агьалийрин ихтиярар хуьнин, четин гьалда авай касдиз гьам юридический, гьамни пулдин такьатралди куьмек гунин жигьетдай ийизвай кIвалахдикай суьгьбет башламишна.
Малум хьайивал, профсоюздин член тир касдин неинки вичин кьилдин, гьакIни хизандин, аялрин месэлаярни (ял ягъунин, сагъламвал хъсанарунин, вузра кIелунин ва икI мад) чпин жавабдарвилик кутазва. Тешкилатдин хиве авай кьилин везифа лагьайтIа, ада гьисабзавайвал, зегьметчи инсандин мажибдиз ва кIвалахдин шартIариз талукьди я — ада гьисабзавайвал, карханайрин администрацийри и месэлаяр кваз кьан тийизвай дуьшуьшар тIимил туш. Мисал яз, хуьруьн майишатдин хилен работник йисан кьиляй-кьилиз кIвалахдалди таъмин тушир карханаяр гзаф ава. Сезондин вахт алатайдалай кьулухъ амай вахтунда абурухъ работникдиз мажиб гунин метлеб амукьзавач. Гьа инай — агъуз мажибар, яшайишдин хилез талукь месэлаяр, четинвилер.
Гьа са вахтунда Муртазали Бибалаевича чпин мулкарал профсоюзар тешкилнавай, зегьметчийрив гзаф къайгъударвилелди эгечIзавай, алай девир яшайишдин рекьяй четинди тирдан гъавурда аваз, кIвалахзавай касдин мажибар датIана хкажиз, абур улакьдалди кIвалахал гъун-хутахун таъминариз алахъзавай, хийир-шийирдин крара куьмекдин къуьн кутазвай карханайрикайни еке разивилелди суьгьбетна. Ихьтинбурукай яз ада Первомайскдин мулкунал алай «Каспий» ГУП-дин, Костек хуьруьн «Кавказдин сар» ООО-дин, гьакIни Мегьарамдхуьруьн райондин «Багъ» КФХ-дин, са жерге маса карханайрин тIварар кьуна.
«Карханадин, тешкилатдин регьбердиз кIан хьайитIа, адаз санал кIвалахзавай коллективдин къадир, къиметлувал чизваз хьайитIа, вири и месэлаяр гьялиз жезвайди я. Гьайиф хьи, гзаф вахтара икI туш — къанундин истемишунрал амал тавуна, регьберри карханада, тешкилатда кIвалахзавай кас, ам бегенмиш хьунин-тахьунин гьиссерал бинеламиш яз, гьар жуьредин багьнайралди кIвалахдилай алуддай чкадал гъизва. Иллаки — азарлуди, вичин «бегьерлувал» тIимил хьанвайди. Гьа ихьтин дуьшуьшра герек я профсоюздин куьмек. Карханади, профсоюзди ва гьукуматди кутIунзавай пуд терефдин икьрарди карханадин регьбердиз кIвалахзавай касдив вичиз кIандайвал эгечIдай мумкинвал гузвач», — лагьана ада.
Гуьруьшдин эхирдай М.Муртазалиева, уьлкведа хьиз, республикадани профсоюзрин кIвалахдик гьерекат кутадай ва зегьметчи инсандин ихтиярар хуьнин рекьяй тешкилатдихъ авай «алатрин» жерге гегьеншардай фикирар авайдакай малумарна.
Жасмина Саидова
