Чав залан хабар агакьна: чи дуст, хъсан инсан, «Лезги газетдин» гьамишалугъ амадаг, Дагъустандин гостехуниверситетдин профессор, правоведенидин ва таможнядин кафедрадин заведующий. Идрис Абдуллаевич Оружев рагьметдиз фена.
И. Оружев 1939-йисан 12-ноябрдиз Кьурагьрин хуьре къуллугъчидин хизанда дидедиз хьана. Юкьван школа медалдалди куьтягьай жегьил Дагъустандин госуниверситетдин тарихдинни филологиядин факультетдик экечIна. Вуз акьалтIарайдалай гуьгъуьниз Оружева Кеферпатан Осетиядин госуниверситетдин юридический факультетни яру диплом къачуналди акьалтIарна.
Зегьметдин рехъ Идрис Абдуллаевича Хив райондин Зизик ва КъванцIил хуьрерин школайра муаллимвилелай гатIунна. Ахпа Кьурагьан урус чIаланни литературадин ва тарихдин тарсар гана.
1964 — йисан январдиз И. Оружев ВЛКСМ-дин Кьурагь райкомдин 1-секретарвиле хкяна. Адан регьбервилик кваз райондин комсомолрини жегьилри производствода, кIелунра, культурадин хиле виле акьадай хьтин крар авуна.
1971-йисуз И. Оружев Кьурагь райондин исполкомдин плановый комиссиядин председателвиле тайинарна. Жегьил тиртIани, ада и везифаярни лайихлувилелди кьилиз акъудна. Районда кIвалахдай йисара ам ВЛКСМ-дин Дагъустандин обкомдин, КПСС-дин Кьурагь райкомдин бюродин членвиле хкянай.
1972-йисалай ада вичин уьмуьр Дагъустандин гостехуниверситетдихъ (виликдай политехнический институт) алакъалу авуна. 1974-йисуз Оружева Ростовдин халкьдин майишатдин институтда экономикадин илимрин кандидатвилин диссертация хвена. Институтдин политэкономиядин кафедрадин ассистент яз кIвалахдив эгечIай филолог, юрист ва экономист старший преподавателдин, доцентдин, политэкономиядин кафедрадин заведующийдин, экономикадин теориядин кафедрадин профессордин, праводин кафедрадин заведующийдин дережадиз кьван хкаж хьана. Эхиримжи цIуд йисуз ам ДГТУ-дин правоведенидин ва таможнядин кафедрадин заведующий тир.
Ада илимдин 300-далай виниз макъалаяр, монографияр, пособияр, учебникар чапдай акъудна. Идрис Абдуллаевича республикадиз ва уьлкведиз вишералди экномистар, правоведар, политикар гьазуруник еке пай кутуна.
Наградайрихъ калтугай кас туширтIани, адан зегьметдиз кутугай къимет гана. Ам «РФ-дин кьилин пешекарвилин образованидин гьуьрметлу работник», «РД-дин лайихлу экономист», «Гьакъисагъ зегьметдай», «Зегьметдин ветеран», «ДГТУ-дин вилик лайихлувилерай» медалрин, «Кьурагь райондин гьуьрметлу агьали» знакдин ва хейлин маса наградайрин сагьиб тир.
Чна рагьметлудан хизандиз, багърийриз, ам чидайбуруз дериндай хажалат чIугунивди башсагълугъвал гузва. Идрис Абдуллаевичан экуь къамат ри рикIелай садрани алатдач.
«Лезги газетдин» редакциядин коллектив
