И йикъара чав Дербентдай рикI тIардай хабар агакьна: лап хъсан инсан, бажарагълу духтур, алим-тещкилатчи, гзаф къени крарик кьил кутаз алакьай общественно-политический деятель Нариман Салманович Рамазанов рагьметдиз фена. Ам чидай вирибуру дериндай яс чIугвазва.
Н.С.Рамазанов 1941-йисуз Докъузпара райондин кьакьан дагъдин Къурушрин хуьре дидедиз хьана. ГъвечIизамаз диде-бубадикай магьрум хьайи аял имийри хуьн хъувуна.
Зигьинлу гадади хуьре ирид класс, Хасавюртда медучилище, Махачкъалада мединститут яру дипломдалди акьалтIарна. Зегьметдин рехъ ада 1965-йисуз Хасавюрт шегьердин больницада хирургвилелай башламишна, гьа са вахтунда заочнидаказ аспирантурадани кIелна.
1972-йисуз Астрахандин мединститутда илимрин кандидатвилин дережа хвена. Адалай кьулухъ генани вичин вири чирвилер ва къуватар инсанрин сагъламвал хуьниз бахшна. Сифтедай Дагъустандин Огни шегьерда цIийиз кардик кутунвай больницадиз регьбервал гана. Инай ам Мозамбикдиз рекье туна. Жегьил хирургди агъзурралди африканвийриз сагъламвал хуьз куьмекна. Анай хтайдалай кьулухъ Дербент шегьердин ЦРБ-диз регьбервал гана. Саки 20 йисуз, хирург яз, вишералди операцияр авуна, инсанар ажалдин къармахрай ахкъудна.
1999-йисуз тежрибалу алим-тешкилатчи Дербентдин медучилищедин директорвиле тайинарна. Адан алахъунар себеб яз лап вини дережадин мумкинвилер авай илимдин центрадиз элкъвена.
Нариман Салмановичакай са шумуд йисуз Дербент шегьердин Собранидин, Дагъустан Республикадин Халкьдин Собранидин депутат, лезгийрин милли «Садвал» гьерекатдин регьберрикай сад, общественный гзаф крарин жавабдар тешкилатчи хьана. Эхиримжи йикъалдини ам шегьердин администрациядин Кьилин меслятчи (куьмекчи), агъсакъалрин Советдин член, Дербентдин гьуьрметлу агьалийрикай сад тир.
Нариман Салманович фасагьатдиз рахадай лектор, агитатор, суьгьбетчи, насигьатчи тир. «Масадаз экв гун патал жув кана кIанда», лугьудай ада. Ам Дагъустан Республикадин лайихлу духтур, гзаф шабагьрин ва гьуьрметлу тIварарин сагьиб тир. Ингье, инсанрив вичин патай экв туна, вич эбеди дуьньядиз фена.
Чна рагьметлудан хизандиз, мукьва-кьилийриз, вири багърийриз башсагълугъвал гузва. Нариман Салмановичан экуь къамат чи рикIера гьамишалугъ амукьда.
«Лезги газетдин» редакциядин коллектив.
