Эхиримжи вахтара Сулейман-Стальский район яшайишдин, экономикадин, культурадин ва маса рекьерай йигин еришралди виликди физва. Муниципальный райондин кьил Нариман Абдулмуталибова къейдзавайвал, и кIвалахриз районда милли проектар ва госпрограммаяр уьмуьрдиз кечирмишуни куьмек гузва.
Малум тирвал, районди “Образование”, “Здравоохранение”, “Хатасуз ва еридин автомобилрин рекьер”, “Хуьруьн мулкар тамамдаказ виликди тухун”, “Экология”, “Алай аямдин школа”, “Михьи яд”, “Инсанар яшамиш жезвай чка ва шегьердин шартIар” милли проектра, республикадин “100 школа”, “Чкадин теклифар” проектра, “Хуьрерин мулкар тамамдаказ виликди тухун”, “Земский духтур” госпрограммайра иштиракзава. Абурун сергьятра аваз райондин ва хуьрерин рекьера, куьчейра къир цана, ремонтрин кIвалахар тухвана, хуьрера общественный мулкар дуьзмишна, дараматар эцигна, гзаф школайрин дараматар хъсан гьалдиз хкана.
“Алай аямдин школа” проектдай Кьасумхуьруьн 1-нумрадин юкьван школада цифровой образованидин ва гуманитарный профилдин “Точка роста” центр арадал гъана. И кар патал дарамат райондин бюджетдин такьатрин гьисабдай ремонтна, ана эцигдай тадаракар Дагъустан Республикадин образованидин ва илимдин министерстводай хкана.
Вини Хъартасрин, Птидхуьруьн, Качалхуьруьн ва Татарханрин школайра чими ийидай системаяр туькIуьр хьунин тегьер хъсанарунин, къазанханаяр ремонт хъувунин, дакIарар ва ракIарар дегишарунин кIвалахар акьалтIарнава. Йисан эхирдалди ихьтин кIвалахар Агъа Хъартасрин ва Испикрин школайрани тамамарда.
2020-йисуз районда “Земский муаллим” проектни уьмуьрдиз кечирмишиз эгечIна. И программадик КIварчагърин юкьван школадин урус чIалан ва литературадин муаллим Лейла Темирханова ва Зизикрин юкьван школадин ингилис чIалан муаллим Регина Гьажикеримова акатна.
Образованидин хиле хъсанвилихъ кьиле физвай дегишвилерикай рахадайла, къейд ийиз кIанзава хьи, Агъа СтIал-Къазмайрал 400 аялдиз чкаяр авай пуд мертебадин ва Алкьвадрал 110 аялдиз чкаяр авай кьве мертебадин школайрин дараматар эцигунин кIвалахарни кьиле физва.
Райондин образованидин управлениди 8 школада модульный пищеблокар эцигунин ва Сийидрин юкьван школада пищеблок тамамдиз ремонт хъувунин патахъай арза ганва.
Районда здравоохраненидин хилени милли проектар уьмуьрдиз кечирмишзава. Райондин центральный больницади рентгеновский флюорограф, ЭХО-КГ тухудай мумкинвални авай УЗИ аппарат ва видеоколоноскоп къачуна. Медицинадин “Тади куьмекдин” автопарк тамамвилелди цIийи хъувунва.
Коронавирусдик начагъбур сагъарун патал рентгенаппарат, кислороддин 10 концентраторар, 30 пульсоксиметр, гьавадин 20 рециркуляторар, азарлуйрал гуьзчивал тухудай 5 монитор, портативный 3 спирометр, бесконтактный 15 термометр къачуна.
Алай йисуз Цмуррин хуьре модульный ФАП монтаж авуна ва ишлемишиз вахкана. ЦIийи Испикрин хуьрени ихьтин ФАП эцигна. Алай вахтунда анаг тадаракламишунин кIвалахар кьиле тухузва.
Райондин центральный больница патал компьютерный томограф тадаракламишдай са мертебадин дарамат эцигунин кIвалахар кьиле тухузва.
“Земский духтур” госпрограммадин сергьятра аваз эхиримжи 2 йисуз районда 5 пешекар кIвалахдалди таъминарна.
Нариман Абдулмуталибова къейд ийизвайвал, райондин здравоохраненидиз меценатри, мергьяматлувилин фондари куьмекар гана. ИкI, апрелдин вацралай “Рычал-Су” заводди ЦРБ-дин инфекцийрин отделенидин 10 кас медработникриз гьар вацран мажибар тайинарна, гьакIни райондин центральный больницадиз 300 агъзур манатдин къимет авай медикаментар, тадаракар, герек маса шейэр къачуна.
Чи баркаллу районэгьли Салман Бабаева Сулейман-Стальский район вилик финин фондуниз 5 миллион манат пул гана. И пулунин такьатрин гьисабдай ЦРБ-диз медицинадин тадаракар маса къачуна, коронавирусдин инфекциядик начагъ хьанвайбур сагъар хъувуна иштиракай духтурриз ва маса медкъуллугъчийриз ашкъиламишдай пулар гана.
РФ-дин Государственный Думадин депутат Абдулгьамид Эмиргьамзаева райондин больницадиз 65 комплект вирусдикай хуьдай (защитный) костюмар, 250 агъзур манатдин къимет авай шейэр рахкурна.
“Хатасуз ва еридин автомобилрин рекьер” милли проектдайни еке кIвалах тухузва.
“Къулайвилер авай шегьердин шартIар” программадай Агъа СтIалрин хуьруьн мулкунал “Женгинин Баркаллувилин” обелиск цIийикIа туькIуьр хъувуна, Герейханован хуьруьн 1-отделенида ва Эминхуьре аялрин майданарни галай паркар ачухна.
“100 школа” проектдай 2020-йисуз Кьасумхуьруьн 1-нумрадин, М. Къараханован тIварунихъ галай КIварчагърин, Р. Османован тIварунихъ галай Герейханован 1-нумрадин ва ЦIийи Макьарин юкьван школайра ремонтрин кIвалахар кьиле тухвана.
“Хуьрерин мулкар тамамдаказ вилик тухун” госпрограмма уьмуьрдиз кечирмишун яз, Эминхуьре спортдин майдан туькIуьрна акьалтIарна, Кьасумхуьр хъвадай целди таъминарунин, Ичинрин хуьруьз газ тухунин, гьакIни мобильный медицинадин центр ва школадин автобус чара авунин кIвалахар давам жезва.
Хазран Кьасумов
