Фагьум-фикир ийиз зегьмет чIугур, фейи рекьиз ачух вилерай килигзавай касди, са кьадар яшариз акъатайла, къвезмай несилриз, насигьат яз, хъсан крар гъилихъди ийида. Садбуру виридаз герек къведай общественный са дарамат, муьгъ эцигда, рекьер, булахар туькIуьрда, муькуьбуру гьар жуьре емишрин къелемар ва я ципицIрин чIереяр акIурда. Гзафбуруз, несилри кIелрай, къуй чир хьурай лугьуз, авур баркаллу крарикай ктабар кхьиз кIанда. Вири ибур рикIин буйругъар, авун герек тир крар, жегьил несил дуьз рекье хьун патал тербия гунин лишанар я. Абур чир тахьайла, цIийи уьмуьрдин, яшайишдин къадирни чир жедач, ада дадни гудач. Гьа ихьтин месэлайриз дериндай фикир, кьилиз акъудай четин, амма виридаз герек пешедиз къимет гуналди, вичин веревирдерни авуналди отставкада авай милициядин (гила полициядин) подполковник АбдулнетIиф НетIифович Пирисмаилова ктаб кхьин кьетIна, и кIвалах ада кьилизни акъудна.
Мукьвара “Милиция гьукуматда чарасуз герек идара я” тIвар алаз адан ктаб чапдай акъатнава. Ана, асул гьисабдай, авторди милицияда жергедин къуллугъчивилелай подполковниквилин чиндал къведалди атIай четин ва баркаллу рекьикай, экъечIай хъутIалрикай, къазанмишай агалкьунрикай, кIвалахда герек къвезвай ва хвена кIандай дуствилинни юлдашвилин алакъайрикай кхьенва. Им АбдулнетIиф Пирисмаилован чапдиз акъатнавай сад лагьай ктаб я. Газет кIелзавайбур гъавурдик хьун патал бязи делилрикай куьрелди ихтилат ийиз кIанзава заз. Пирисмаилов 1932-йисан 22-ноябрдиз Кьулан СтIалдал дидедиз хьана. АбдулнетIифа хайи хуьруьн, Кьасумхуьруьн мектебра кIелна, чирвилер къачуна. 1951-йисуз ам ДСХИ-дин ветеринарвилин факультетдик экечIна. Вахар гъуьлериз фена, диде ялгъуз амукьун себеб яз, ам институт гадаруниз, са кеспидин кьил кьуниз мажбур хьана. Адан савадлувал ва викIегьвал акур райондин прокурорди АбдулнетIиф вичин идарадиз секретарвиле кьабулна. Гъавурда аваз, михьи кIвалах гъиляй къвезвай жегьил гуьгъуьнлай РОВД-дин секретарь-счетоводвиле кIвалахал хкана. Амма АбдулнетIифа чирвилер къачуникай датIана фикирзавай. Гьа икI ам Краснодардин Вирисоюздин юридический институтдик экечIзава.
Гуьгъуьнлай зегьметдин рехъ А.Пирисмаилова оперуполномоченныйвиле, ахпа старший уполномоченныйвиле кIвалахуналди давамарна. Адаз милициядин Отличник знак гузва… 1964-йисуз АбдулнетIиф силисчивиле ва пуд йисалай Сулейман-Стальский райондин ОВД-дин начальниквиле тайинарзава. Кьуд йисалай ам кьилевай коллектив республикада кIвенкIвечийрин жергедиз акъатзава. ТIвар республикадин Гьуьрметдин доскадиз акъудзава. Адаз майорвилин чин гузва. Ада Москвада совещанийрани иштиракна. Сулейман-Стальский РОВД-да А.Пирисмаилова саки 12 йисуз кIвалахна. И вахтунда ина къайда-низам, хъсан крар гзаф хьана. Чуьнуьхунар, пиянискавилер амукьнач…
АбдулнетIиф НетIифович подполковникдин чинда аваз, 1986-йисуз отставкадиз экъечIна. И чIавуз адан 54 йис тир. А.Пирисмаилован веледрини бубадин рехъ кьурдакай лугьун кутугнава. ИкI, хва Мусаиба КГБ-да 31 йисуз къуллугъна, подполковниквилин чинда аваз, пенсиядиз экъечIна. ДГУ-дин химбиологиядин, ахпа юридический факультетар куьтягьай чIехи руш Назлухалума МВД-да 30 йисуз къуллугъна, амни, подполковник яз, пенсиядиз экъечIна.
Аквазвайвал, и хизанда подполковниквилин чиндиз са шумуд кас лайихлу хьана. Абуру законар кьилиз акъудунин рекье намуслувилелди зегьмет чIугуна. А.Пирисмаиловахъ гьукуматдин гзаф шабагьар ава. Амма виридалайни важиблуди адаз халкьди исятдани екез гьуьрмет авун я. Агъсакъалди вичин 5 веледдал — пуд хцелни 2 рушал, хтулрал дамахзава. Адан “Милиция гьукуматда чарасуз герек идара я” ктаб кIелдайбуру хушдиз кьабулдайдал шак алач. Чи мурад автордихъ сагъламвал, яргъал уьмуьр хьун я.
Райсудин Набиев
