Дагъустан Республика электроэнергиядалди дурумлудаказ таъминарунин ва и карда атIунар тахьунин макьсаддалди регионда куьруь вахтунда тамамарна кIанзавай са жерге серенжемрин план туькIуьрнава, хабар гузва РД-дин энергетикадин ва ЖКХ-дин министерстводин пресс-къуллугъди.
Ихьтин къарар РД-дин энергетикадин ва ЖКХ-дин министр Манвел Мажонц “Россети Кеферпатан Кавказ” компаниядин руководителдин везифаяр тамамарзавай гендиректордин заместитель Роман Левченкодихъ галаз гуьруьш хьайи вахтунда кьабулна.
“Гуьруьшдин вахтунда “Россети Кеферпатан Кавказ” карханадин векилди алукьзавай зулунни хъуьтIуьн сезондиз гьазурвал акун патал пландик кутунвай мярекатрикай хабар гана. Электроэнергиядалди таъминарзавай объектрал жезвай технологический гъалатIар тIимиларун патал и серенжемрин кIватIалдихъ кьетIен важиблувал ава. Кьилди къачуртIа, Къайтагъ ва Ахцегь районрин мулкарал квахьзавай электроэнергиядин кьадар тIимиларунин макьсаддалди пилотный проектар уьмуьрдиз кечирмишунин месэла мукьуфдивди ахтармишнава”, — малумарзава министерстводи.
Идалайни гъейри, Манвел Мажонца, федеральный ва республикадин программайрин сергьятра аваз, Дагъустанда эцигзавай объектар технологический ре-кьяй алакъалу авуниз талукь яз энергетикри кьиле тухузвай кIвалахдин важиблувал къейдна.
«Лезги газет»
