26-28-мартдиз Казань шегьерда мини-футболдай Дагъустандин ва Татарстандин халкьарин дуствилин сад лагьай Кубок патал кьиле фейи турнирда чи республикадин футболдин ветеранрин “Кавказ” клуб гъалиб хьана.
Чпин яшар 40 йисалай виниз тир футболистрикай ибарат клубдихъ гьам республикадин къенепата, гьамни къунши регионра хьайи акъажунра къазанмишай агалкьунрикай ва вилик квай месэлайрикай чаз клубдин регьбер Феликс Зейналова суьгьбетна. Футболдал рикI алай кас яз, ада 2010-йисуз тешкилай “Кавказ” командади къенин юкъуз республикадилай къеце регионра, гьатта маса уьлквейрани кьиле физвай турниррани иштиракзава. Гьиниз фейитIани, “Кавказ” командадиз еке гьуьрмет ава, ам лап чимивилелди кьабулзава. И кардин сир вуч ятIа, клубдин регьбердихъ галаз суьгьбетдайла, гъавурда гьатзава…
— И гъилера чна Татарстанда кьиле фейи турнирда иштиракна — ам РД-дин физический культурадин ва спортдин министерстводин календардик квай мярекат тир. Гьаниз килигна, рекьерин гьакъи чаз министерстводи чара авуна. Амай харжияр спонсоррин патай хьана. Казанда чун лап хъсандиз къаршиламишна. Кьабулзавай терефди чаз жуьреба-жуьре экскурсияр, мярекатар тешкилнавай. Чун Татарстанда машгьур алишверишдин сеть тир “Бахетле” компанияди лап хушдаказ кьабулна, герек тир вири харжиярни вичин хивез къачуна. Алатай йисан зулухъай чи республикадиз мугьман хьайила, чнани абур чимидаказ кьабулайди тир. Нетижада чи арада иллаки чими алакъаяр арадал атанва — суьгьбетзава ада.
Малум хьайивал, ярумчух финалдиз 4 команда акъатна: Казандин “Фемида” (къуллугъчи судьяйрикай ибарат команда), “ЦIайлапан” (алатай йисарин чемпион, дугъриданни, гужлу команда), “Алгъа” ва “Кавказ” (Махачкъала). Къизгъин акъажунра Дагъустандин футболистри 1-чка кьуна ва ватандиз гъалибчийри Кубок, пишкешар хкана.
Къейд ийин, вичин ери-бине Докъузпара райондин Миграгърин хуьряй тир Феликс Зейналов Каспийск шегьерда чIехи хьана. ДГУ-дин советрин алишверишдин факультет акьалтIарайдалай кьулухъ ада яргъал йисара вичин пешедай уьлкведин жуьреба-жуьре регионра кIвалахна. Тешкилатчивилин руьгь квай ва футболдал рикI алай адан кьилиз клуб арадал гъунин ва спортдин турнирра Дагъустандин патай иштиракунин фикир атана. И фикир кьилизни акъудна — виликан Маркарован школадин бинедаллаз “Кавказ” клуб арадал атана, тахминан са яшда авай (им 40 йисав агакьнавай вахт тир) юлдашрихъ галаз республикадилай къеце жезвай акъажунриз физ башламишна.
ИкI, алатнавай 10 йисалай гзаф вахтунда “Кавказди” 50-далай виниз кубокар къазанмишнава.
— Са фикирдал алаз тупламиш хьанвай чна Махачкъаладин 39-нумрадин школадин спортдин майдандал вердишвилер къачузва, гьар йикъан нянихъ, асул кIвалахдилай гуьгъуьниз чун футбол къугъваз физва, вучиз лагьайтIа, тренировкаяр акъвазарна виже къведач. Маса регионра чи къаршидиз экъечIзавайбур гужлу ва тежрибалу командайрин ветеранар я, эгер вердишвилер, сагъламвал датIана гуьзчивилик хуьн тавуртIа, чавай кIвенкIвечи чкаяр кьаз жедач. Гьа и себебдалди клубдиз чна кьабулзавайбурни пешекар футболистар хьайи ксар я.
Гьа са вахтунда ада гьайифдивди къейд авурвал, 40 йисалай алатнавай ксарин арада мягькем сагъламвал ва бедендин гужлувал квахь тавунвайбур тIимил ава. И жигьетдай Феликс Зейналовича районрин администрацийривай чпин мулкарал спортдал рикI алай ксаривай и кардал машгъул жедай майданар туькIуьрун тIалабзава. Идалайни гъейри, ички хъуникай, пIапIрус чIугуникай гьич рахунни герек туш.
Клубдик экечIдайла, мад са кар фикирда кьуна кIанзава — йисан вахтунда (гьич тахьайтIа 5-6 сеферда) командади къецепатан турнирра иштиракзава, къенепатан гуьруьшарни ара-ара жезва. Гьаниз килигна, футболистдихъ, тади гьалда кIвачин хьана, рекьиз экъечIдай мумкинвал хьана кIанда.
Командадик высший лигадик кваз къугъвай машгьур тренерар ква — Мегьамедтагьир Вагьабов, Сергей Галумян, Руслан Муьгьуьдинов (мини-футболдай Россиядин виридалайни хъсан футболист), гьакIни Залимхан Тажудинов, Нариман Омаров, Али Муртазалиев. Теклиф атанмазди, тадиз рекье гьатзава. Къейд ийин, и карда мукьвал-мукьвал РусГидро компаниядини, автобус чара авуналди, куьмекзава. Кьилдин карчийрин патайни пулдин куьмекар агакьзава. Месела, парталар (форма) “Анжи” командадин патай пишкешна.
Формадин месэла, дугъриданни, важиблуди я. ГьикI лагьайтIа, маса регионриз фейила, анра чи тIвар кьурла, майдандиз экъечIайла, парадра иштиракайла, вири командадал сад хьтин парталар алайла, лап вижевайдаказ аквазва. Эхиримжи гъалибвал къазанмишайла, цIийи формаяр пишкешун хиве кьунвайбур ава.
Малум хьайивал, четин месэлаяр мад ава — республикадиз гъалибвилер гъизвай футболистриз-ветеранриз чпин я офис, я хсуси майдан авач. Эгер ветеранрин спортдин месэладиз са кьадар фикир ганайтIа, лугьузва Ф.Зейналова, клубдин бинедаллаз Кеферпатан Кавказда санани авачир, виниз тир пешекарвилин судьяйрин клуб, аялрин клуб ачухиз жедай, гьикI хьи, лап хъсан тренерарни, судьяярни чахъ авазва.
ЯтIани, четинвилер кваз такьуна, командади турнирра иштиракзава, лап хъсан футболистар лагьай тIвар дамахдивди хуьзва.
Жасмина Саидова
