СтIал Сулейманан райондин Эминхуьряй тир карчи, динэгьли Шагьпаз Муслимович Асаханов мукьвара Ставрополдин крайдин муфтий Мугьаммад Рагьимован меслятчи (советник) яз тайинарнава.
М.Рагьимов 2010-йисалай крайдин муфтий я. Ада регьбервал гузвай диндин управленидик мусурманрин официальнидаказ регистрация авунвай 55 тешкилат акатзава. Муфтийди Ставрополдин крайда цIийи мискIинар эцигунин, куьгьнебур цIийикIа туькIуьр хъувунин жигьетдай еке кIвалах кьиле тухузва.
Чи ватанэгьли къецепатан региондин муфтийдин меслятчи яз тайинаруни мад сеферда халкьарин арада авай дуствал къалурзава.
Къейд ийин хьи, Шагьпаз Асаханов “Лезги газетдин” редакциядин амадагрикай сад я. Са шумуд йис идалай вилик ада редакциядин конференц-зал цIийикIа туькIуьр хъувуниз пулдин такьатар чара авунай. Идалайни гъейри, мергьяматлувилел машгъул жезвай карчиди гьар йисуз СтIал Сулейманан райондин агьалийриз вичин патай 50 экземпляр “Лезги газет” кхьизва. Чна Шагьпаз Асахановаз муфтийдин меслятчидин дережа мубаракзава, Аллагьдин рекье тухузвай кIвалахра адахъ мадни еке агалкьунар хьана кIанзава.
«Лезги газет»
