27-майдиз Россиядин библиотекарри чпин пешекарвилин югъ шад гьалара къейдна. СтIал Сулейманан районни къерехда акъвазнач. ИкI, райондин кьилин библиотекадин (ЦБС) хуьрера кардик квай са жерге филиалра жуьреба-жуьре серенжемар кьиле тухвана. Кьилди къачуртIа, Эминхуьре и йикъаз талукьарнавай “Ачух ракIаррин югъ”, Агъа СтIалдал, Герейханован хуьре кьиле тухвай мярекатарни рикIел аламукьдайбур хьана.
Эминхуьруьн библиотекадин заведующий Алла Буржалиевади иниз ктабрал рикI алайбуруз, муаллимриз ва хуьруьн мектебда кIелзавай аялриз эвернавай. Ада дуьньяда ва чи уьлкведа кхьинар, библиотекаяр арадал атуникай, ктабар чапдай акъудуникай суьгьбетна, библиотекадин пешекарриз талукь итижлу делилар гъана. Жаван кIелдайбуруз гьар са ктабдихъ вичин кьетIен чка, гьакIни ктабриз ва абурун авторриз юбилейрин йикъар авайди, абуруз талукьарна выставкаяр ва мярекатар кьиле тухузвайди чир хьана. Библиотекадин пешекардилай гъвечIи кIелчийрин фикир ктабрал желб ийиз алакьна. КIватI хьанвайбур ктабрин выставкадихъ галазни танишарна.
Чпин нубатдай, школада кIелзавай аялри Алла Буржалиевадиз пешекарвилин сувар тебрик авунихъ галаз сад хьиз, цуькверин кIунчI багъишна, библиотекадикай ва ктабри инсандин уьмуьрда къугъвазвай важиблу ролдикай шиирар кIелна.
Агъа СтIалрин хуьруьн библиотекада “Мугьманар кьабулиз чун гьамиша гьазур я” лишандик кваз кьиле тухвай серенжемдиз мектебда 1-класс акьалтIарнавай ва аялрин бахчада тербия къачузвай бицIекриз эвер ганвай. Библиотекада абур патал экскурсия тешкилнавай. Иниз сифте камар къачунвай аялриз авай кьван ктабар акурла, абур мягьтел хьана амукьнавай. Абуру чеб патал акъуднавай ктабарни журналар еке итиждивди тупIалай авуна. БицIекриз кIелдайбурун формуляр ва кIелдайбурун зал вуч лагьай гафар ятIа, гьакI лишанлу вакъиайриз талукьарна библиотекада кьиле тухузвай мярекатрикай чирвилер гана.
Библиотекада кьиле тухвай экскурсиядилай кьулухъ аялри, чеб иниз мукьвал-мукьвал къведайвал, чпин тIварар кIелчийрин сиягьда кхьиз туна, чпикай хъсан, низамлу кIелдайбур жедайди лагьана.
Мадни и юкъуз ктабар вахтунда библиотекадиз хкун рикIелай алудзавай ксар патал “РикIел хуьз тежер кIелчи” лишандик кваз серенжемни кьиле тухвана.
Герейханован хуьруьн библиотекадин заведующий Эльза Рустамовадини, пешекарвилин югъ къейд авун яз, “Библиотека — руьгьдин камалдин кIвал” лишандик кваз чирвилер гудай мярекат кьиле тухвана, “Пеше — библиотекадин къуллугъчи” выставка тешкилна.
Регина Семедова
