Дидевилин капитал къанундалди ишлемишиз жедай рекьерикай талукь тир идарайри мукьвал-мукьвал­ ха­барар гузва. Къанунда къалурнавайвал, капиталдин та­кьатар харж ийиз жедай макьсадар вад ава. Ингье абур: 

—           яшамиш жезвай кIвалин шартIар хъсанарун. Ме­села, кIвал эцигун ва я ипотекадай квартира маса къачун;

—           аялдин образование — бахчадилай вуздал кьван;

—           аялар-инвалидар яшайишдихъ галаз вердишарун, реабилитация авун;

—           дидедин кIватI жезвай пенсия патал;

—           пуд йис жедалди кьвед лагьай аялдиз гьар вацра пул гун.

Капиталдин кьадардин сергьятра аваз, пулунин та­кьатар санал са шумуд хилезни ишлемишиз жеда. Ам­ма пул, нагъддаз элкъуьрна,  гъилиз къачудай мумкин­вал къанунди гузвач.

Ипотекадин бурж вахкунин, яшамиш жедай кIва­ле­рин кредитдай сифтегьан такьатар, гьакIни мектебда кIелдай вахтунилай вилик квай яшда аялдиз образование гунин рекьера капиталдикай аялдин пуд йис тамам тахьанмазни менфят къачуз жеда.

«Лезги газет»