Рутул райондин Хъуьлуьдрин юкьван мектебда чахъ галаз санал кIвалахай, 50 йисалай виниз чи хуьруьн балайриз дерин чирвилер гузвай физикадинни математикадин муаллим, старший вожатый, “Рутулрин хабарар” газетдин штатдик квачир фотокорреспондент Исмаилов Абдуллагь Исмаилович “Лезги газетдиз” вичикай кхьиниз лайихлу кас я.
Ам Хъуьлуьдрин хуьре колхозчидин хизанда 1951-йисуз дидедиз хьана. 1957-йисалай 1968-йисалди ада мектебда агалкьунралди чирвилер къачуна.
Савадлувилин рехъ давамарунин мураддалди Абдуллагь 1969-йисуз ДГПУ-дин физикадинни математикадин факультетдик экечIна. Заочнидаказ кIелзавай студент яз, 1970-1978-йисара ада райондин Лакунрин хуьре муаллимвиле кIвалахна. Институт куьтягьайла, райондин образованидин идаради ам Хъуьлуьдрин хуьруьн школадиз рекье туна. Ана 1972-йисалай муаллимдин хиве старший вожатыйвилин везифани туна. Райондин Кичерин хуьре физикадинни математикадин муаллим авачир, Абдуллагь Исмаиловича гьанани 25 йисуз аялриз чирвилер гана.
Гьакъисагъвилелди кIвалахзавай Абдуллагьаз 1981-йисуз “Вожатый- методист” лагьай тIвар гана. Гьар гатун вахтунда ам аялар галаз “Артек”, “Орленок” ва маса лагерриз физвай. Лагьана кIанда хьи, Абдуллагь Исмаилова гьам вожатыйвилин, гьамни муаллимвилин везифаяр вини дережада аваз кьиле тухузвай. 1995-йисуз ам виниз тир категориядин муаллимвилин тIварцIиз лайихлу хьана. 2016-йисуз вожатыйдиз “Россиядин Федерациядин умуми образованидин гьуьрметлу работник” лагьай тIвар гана. Идалай гуьгъуьниз, 2019-йисуз ада Вирироссиядин “Педразвитие” викторинада кьве диплом къазанмишна. Районда яш хьанвайбурун арада кьиле фейи конкурсда, компьютеррин акъажунра ада 1-чка кьуна.
Абдуллагь муаллим жегьил несил патални лап хъсан чешне я. Ада гьамиша цIийивилерихъ ялунин, гьакъисагъдаказ зегьмет чIугуналди, дуьз рекье аваз финин чешне къалурзава. Абдуллагь муаллимди хуьрера ва районда кьиле физвай мярекатра, фотоаппаратни гъиле аваз, активнидаказ иштиракда. Ам галачиз саки са мярекатни кьиле физвач. Хуьрера жезвай дегишвилерикай, агалкьунрикай райондин газетдиз кхьизва. Чаз адахъ мадни еке агалкьунар хьана кIанзава.
Саид-Агьмед Абдурашидов,
Хъуьлуьдрин хуьр
