Чи ватанэгьлияр — гьар сана
“Зи туьд зур сятда сагъар хъувунай Эмин Рагьимович сагърай, бязи духтурривай са шумуд йисуз сагъариз хъхьаначир”, — ихьтин келимаяр мукьвара заз Краснодарда кардикай квай “СитиКлиник” медцентрадин сайтдай акуна. Разивилин гафар медцентрада агалкьунралди кIвалахзавай чи ватанэгьли, духтур-уролог Эмин Рагьимович Къачаеваз талукьарнавайбур тир.
Ам 1974-йисан 17-сентябрдиз Махачкъалада университетдин муаллим, къурушви Рагьим Надировичан хизанда дидедиз хьана. 1989-йисуз Махачкъалада 13-нумрадин юкьван мектеб, 1989-1991-йисара медицинадин институтдин патав гвай махсус класс тафаватлудаказ акьалтIарна. Медицинадин рекьяй дерин чирвилер къачунин мурад рикIе авай жегьил 1991-йисуз ДГМА-дин сагъарунин ва профилактикадин факультетдик экечIна, 1997-йисуз анаг тафаватлудаказ акьалтIарна. 1997-1999-йисара ада Кубандин медакадемиядин клиникадин ординатурада “урология” пешедай алава чирвилер къачуна. Эмин Къачаева кIелай вири чкаяр тафаватлудаказ куьтягьна.
Сифтедай Краснодардин тади куьмекдин азарханада, 2002-йисалай Краснодардин крайдин клиникадин азарханадин урологиядин центрада духтур-уролог яз зегьмет чIугуна. Кьуд-вад йисуз ина тежриба кIватIна, 2005-йисалай инихъ пешекар духтурди Краснодарда авай гзаф терефрин «СитиКлиник» медцентрадин урологиядин отделенидин заведующийвиле кIвалахзава.
Саки къанни вад йисан тежриба авай пешекардиз медидарадин коллективдин, тинишрин арада еке гьуьрмет ава. Эмин Рагьимовича сагъар хъувур хейлин ксари медидарадин махсус сайтдиз адан тIварцIихъ алхишдин келимаяр кхьенва.
“За адан гуьзчивилик кваз сагъарунин серенжем кьиле тухвана. Эмин Рагьимович гзаф ди-къетлу, савадлу, вичин кардин гъавурда авай пешекар я. Зун медицинадин хейлин идарайриз фена, амма санани вилив хвейи нетижаяр арадал атанач. Сагъламвал ва кIвалахда еке агалкьунар хьурай вахъ, гьуьрметлу духтур!” — кхьенва са краснодарвиди.
Везифаяр гьакъисагъвилелди тамамарзавай пешекар тирди къейд авуналди, Эмин Къачаеван куьмек себеб яз чпин кIвалериз, хизанриз шадвал хтана лугьузвайбур мадни гзаф ава. Азарлуйрихъ галаз рахадай къайда-эдеб чидай, абурун дердиникай рикIивай хабар кьадай къилихар авай духтурди ватанэгьлийризни алакьдай куьмекар гузва. Кьилди къачуртIа, ада гьар вацра хайиди тир Къурушрин хуьре (Хасавюрт район), пулсуздаказ меслятар къалуруналди, агьалийриз куьмекар гузва. Дуьньяда чкIанвай тIугъвал себеб яз, алай йисан апрелдилай гьар вацра ватанэгьлийриз меслятралди куьмекар гудай серенжем кьиле тухуз жезвач. Амма коронавирусдин гьалар яваш хъхьайвалди, духтурдиз адетдиз элкъвенвай кар давамар хъийидай къаст ава.
Пешекар духтур датIана илимдални машгъул я. Адан къелемдикай къанни цIудав агакьна медицинадиз талукь илимдин макъалаяр хкатнава. Гьар йисуз урологиядин конгрессра, жуьреба-жуьре форумрани конференцийра иштиракзава. Алатай йисара ада Краснодардин онкодиспансерда, Ростовдин госмедуниверситетда пешекарвилин дережа хкажна. Ада вич алай аямдин истемишунриз вири патарихъай жаваб гузвай, цIийи къайдайрикайни тадаракрикай менфят къачузвай пешекар тирди тестикьарнава.
Духтур вичин уьмуьр инсанриз къуллугъ авуниз бахшзавай кас я. КIвалахдин рекьяй пешекарвални гьакъисагъвал, тежрибалувални савадлувал къалурайла, гьар садахъ инсанрин арада гьуьрмет, нуфуз жеда. Са шакни алачиз, Эмин Къачаевни гьахьтинбурукай сад я. Къуй адахъ мадни агалкьунар хьурай!
К.Ферзалиев
