Образованидин ва илимдин хилера гуьзчивал авунин федеральный къуллугъди ва Педагогикадин уьлчмейрин федеральный институтди (ФИПИ) 2021-йисуз государстводин сад тир имтигьандиз (ЕГЭ) ва государстводин асул имтигьандиз (ОГЭ) гьазур жезвай мектебар акьалтIарзавай жегьилар ва муаллимар патал менфятлу хьун лазим тир материалрай навигатор кардик кутунва. “ГИА-дин навигатор” Рособрнадзордин сайтдин махсус чина ава, хабар гузва идарадин пресс- къуллугъди.
“ТIугъвалдин шартIара чирвилер гунин гьерекатдин муракабвал фикирда кьуналди, чна и навигатор выпускникриз ва абурун муаллимриз имтигьанриз гьазурвал акун патал герек делилар жагъуриз куьмек гунин макьсаддалди гьазурнава. Материалар чна, 2020-йисан имтигьанрин кампаниядин нетижаяр, гьакIни 2021-йисан ЕГЭ-дик ва ОГЭ-дик кутунвай дегишвилер кваз кьуна, тади гьалда цIийи хъувунва. Абур гьам классда тарсар тухун тешкилун патални, гьамни яргъал мензилда аваз жува-жуваз чирвилер къачудайлани менфятлу жеда. Чна вири выпускникрив менфятлу ва кар алай, нетижаяр кьадай аттестациядиз гьазур жез куьмек гудай делилар агакьарун важиблу яз гьисабзава”, — лугьузва Рособрнадзордин руководитель Анзор Мусаева.
“ГИА-дин навигаторда” кIелунин 2020/2021-йисуз имтигьанар тухунин гьакъиндай важиблу делилар ава. ГьакIни ада мектебар акьалтIарзавай жегьилриз ва муаллимриз Рособрнадзордин ва ФИПИ-дин ресурсра авай материалрай кьил акъудиз куьмек гун лазим я. Ина менфятлу материалар жагъуриз жедай чкайриз рекье твазвай ссылкаяр, абурукай хабар гузвай гъвечIи текстер ва я видеороликар ава. Ишлемишзавайбурун къулайвал фикирда кьуна, “ГИА-дин навигаторда” авай вири материалар пуд паюниз чара авунва: “ЕГЭ-диз гьазурвал аквадай материалар”, “ОГЭ-диз гьазурвал аквадай материалар” ва “Муаллимар патал материалар”.
Хабар гузвайвал, “ГИА-дин навигаторда” авай делилар, кухтазвай дегишвилер гьисаба кьуна, вахт-вахтунда цIийи хъийида, аниз материалар алава хъийида.
«Лезги газет»
