И мукьвара Мегьарамдхуьруьн райондин Ярагъ-Къазмайрин мектебдин бинедаллаз педагогвилин устадвилин рекьяй Республикадин V фестиваль кьиле фена. Адан макьсад яратмишунрин тегьерда кIвалахзавай бажарагълу педагогриз куьмек гуникай, пешекарвилин барадай хкаж жедай рекьер ачухуникай, абурун кIвалахдин тежриба гегьеншаруникай ибарат тир.
Фестивалдиз жуьреба-жуьре йисара “Йисан муаллим” конкурсда гъалиб хьайибур ва призерар, Дербент ва Мегьарамдхуьруьн районрин умуми образованидин идарайрин методистар ва педагогар кIватI хьанвай. Мярекатда ДИРО-дин ректордин меслятчи Эльвира Сайпуевади, “Россиядин йисан муаллим — 2018” конкурсдин гъалибчи, “Дагъустандин йисан муаллим” клубдин председатель Альбина Аюбовадини иштиракна.
Мегьарамдхуьруьн райондин кьил Фарид Агьмедован тапшуругъдалди мярекатда иштирак авур муниципальный райондин кьилин сад лагьай заместитель Гьабилуллагь Мурадалиева фестивалдин мугьманар тебрикна ва адан иштиракчийри бегьерлудаказ кIвалахна кIанзавайди алхишна.
Мярекат шадвилин гьалара ачухайдалай гуьгъуьниз пленарный заседание гатIунна. Анал чирвилер гунин ери хкажунин, мектебар тадаракламишунин, гьа гьисабдай литературадалди таъминарунин, педагогрин кIвенкIвечи тежриба гегьеншдиз машгьур авунин ва бажарагълу, яратмишунрин тегьерда кIвалахзавай педагогриз куьмек гунин месэлаяр веревирдна.
Пленарный заседанидилай гуьгъуьниз фестивалдин иштиракчияр агъадихъ галай секцийра кIвалахунал элячIна: “Урус чIал ва литература”, “Ингилис чIал”, “Химия ва биология”, “Физика ва информатика”, “Къецепатан чIал”, “Тарих ва обществознание”, “География”, “ИЗО”, “Сифтегьан классар”.
Мярекатдин иштиракчийриз райондин лап хъсан муаллимрин, республикадин ва муниципалный конкурсра гъалиб хьайибурун, призрин чкаяр кьурбурун патай мастер-классар, тренингар, методикадин рекьяй семинарар тешкилна. Фестивалдин мугьманри чпихъ инновацийрин рекьяй хьанвай тежриба, чпи чирвилер гунин карда ишлемишзавай цIийи технологияр, аялрихъ галаз кIвалах тухунин цIийи къайдаяр раижна.
Фестиваль кьиле фидай чIавуз шабагьар вахкунин серенжемни кьиле фена. ИкI, Гьабибулагь Мурадалиева ДИРО-дин ректордин меслятчи Эльвира Сайпуевадив методикадин рекьяй тежриба кардик кутунай муниципальный райондин патай Гьуьрметдин грамота, фестивалдин иштиракчийрив Мегьарамдхуьруьн райондин образованидин управленидин патай чухсагъулдин чарар вахкана.
«Лезги газет»
