И мукьвара Ахцегь райондиз Росимуществодин территориальный управленидин, Республикадин культурадин ирс хуьнин рекьяй агентстводин ва Республикадин тарихдин, медениятдин ва архитектурадин памятникар хуьдай центрадин руководителар, пешекарар атана. Абуру муниципалитетдин мулкунал алай тарихдин имаратар гьихьтин гьалда аватIа ахтармишна. Идан гьакъиндай “Лезги газетдиз” райадминистрациядин пресс-къуллугъди хабар гана.
Районда авай чIавуз пешекарарри Ахцегьрин хуьруьн жуьмя мискIин, Хуьруьгрин хуьре авай минара ва Ахцегьрин къеле саламатдиз хуьниз талукь месэлаяр веревирдна. Йисандавай-суз татугай гьалдиз къвезвай, акваз-акваз чкIизвай Ахцегьрин къеледиз кьетIен фикир гана.
“Ахцегьрин къеле — им Россиядин виридалайни кьиблепата бинеламиш хьанвай, федеральный метлеб авай памятник яз гьисабнавай тарихдин ва архитектурадин имарат я. Къеле 1839-йисуз урусрин аскерри генерал Головинан регьбервилик кваз лап куьруь вахтунда — анжах 40 юкъуз эцигайди я”, — къейдна чешмеди.
Ахцегь райондин кьил Осман Абдулкеримова райондин ва адан агьалийрин багьа ивир тир медениятдин и имарат авай гьалдихъ галаз алакъалу яз секинсузвал къалурна ва районэгьлияр тарихдин имарат яз къеле хуьник чпин пай кутаз гьазур тирди къейдна.
Совещанида иштирак авур жемиятдин векилри къеле кирида кьурдалай инихъ алатнавай вахтунда ам саламатдиз хуьн патал гьич са жуьрединни серенжемар кьабул тавунвайдакай лагьана ва тарихдин и къиметлу имарат, къайгъусузвилелди эгечIун себеб яз, гьакI гъиляй физвайдахъ галаз алакъалу яз секинсузвал къалурна.
Ахцегьа авай чIавуз мугьманри къеле авай гьал чкадал фена ахтармишна.
Къеледин къав уьцIенвайди, адан къвалав гвай мискIиндин цлар чкIанвайди, имаратдин мулкар ва дараматар разивал ийиз тежедай гьалда авайди тестикьарна.
“Идалай гуьгъуьниз райондин вилик-кьилик квай ксарин, администрациядин пешекаррин, имарат кирида кьунвайдан векилдин ва республикадай атанвай пешекаррин иштираквал аваз алава совещание кьиле тухвана”, — хабар гана райондин пресс-къуллугъдин векилди.
«Лезги газет»
