Алай йисан сифте кьилелай Россиядин зегьметдин базарда кIвалахдалди таъминарунин жигьетдай виридалайни хъсан теклифар, адетдиз элкъвенвай программистар квачиз, инженерриз, пилотриз ва духтурриз атана, хабар гузва Роструддин пресс-къуллугъди.
ЦIийи хъувунвай делилар гъуналди, идара вичин малуматда Россиядин кIвалахдин азад тир чкайрин умуми “Россияда кIвалах” базадин делилрал бинеламиш хьана.
Абурай малум жезвайвал, Москвадин авиакомпанийрикай сада ингилис чIал чизвай, лазим тир вири документар гвай, гьакIни гьавадин гимийрин кьилди къачур модель гьялиз чизвай пилотдиз 330 агъзур манат мажиб гуда.
Вертолетрин ва самолетрин командиррин ва кьвед лагьай пилотрин игьтияж Красноярский крайда, Якутияда ва Юграда ава. И регионра теклифзавай мажибар 140 агъзур манатдилай 250 агъзур манатдив агакьзава.
Зегьметдин къимет яз, вацра 200 агъзур манатдилай гзаф Калининграддин ва Челябинскдин областра, Чукоткада, Татарстанда ва Якутияда инженерриз гуз гьазур я.
Неинки Якутияда ва Камчаткада, гьакIни Воронеждин ва Свердловскдин областра, Красноярский крайда жуьреба-жуьре пешекарвал авай духтурар гуьзлемишзава. Абурун мажибар 100 агъзур манатдилай виниз жеда, алава хъувуна Рострудда.
Программистриз чпин пешекарвилин бажарагъ 150-250 агъзур манатдихъ малумарун теклифзава.
«Лезги газет»
