2021-йисан сифтегьан пуд вацран вахтунда  Дагъустан Республикадин агьалийри ва мугьманри,  маса къачузвай шейэрин ва тамамарнавай къуллугърин гьакъи гудайла,  21 миллион сеферда банкарин картаяр ишлемишна. Идакай чаз Россиядин Банкунин региондин Отделениди хабар гузва.

Нагъд пул галачиз тамамарзавай серенжемрин умуми кьадар  тахминан 15 миллиард манатдиз барабар я. 2020-йисан сад лагьай кварталдив гекъигайла, и делил 46,7 процентдин  чIехи хьанва.

1-апрелдин делилралди, региондин мулкунал банкарин гьахъ-гьисабдин 2 миллиондилай гзаф  картаяр ишлемишзава, 814 банкомат  ва 7 агъзур электронный терминал кардик ква.

“Нагъд пул галачиз гьахъ-гьисаб авунин къайдадин машгьурвал  къвердавай гзаф хьунин бинеда ­не­инки сервис къулайди хьун, гьакI­ни Россиядин Банкуни тIем акакьдай финансрин къуллугърин кьа­дар­ артухарунин программа уьмуьр­диз кечирмишун ава.

Республикада гьакъи гьахъ-гьисаб ийидай картаяр кьабулдай 8 агъзурдалай гзаф тадаракар ава. Къенин юкъуз картадин куьмекдалди МФЦ-да государстводин ва муниципальный къуллугърай, региондин образованидин бязи идарайра тIуьнин, общественный транспортда аваз санай масаниз финин гьакъи гуз жезва”, — къейдзава Отделенидин — Дагъустан Республикада авай Милли Банкунин управляющий Мурад Идрисова.

Россиядин Банкунин региондин Отделениди ва Дагъустан Республикадин Гьукуматди тIем акакьдай фи­нансрин къуллугърин ва нагъд пул галачиз тамамарзавай серенжемрин кьадар (республикадин тIи­мил агьалияр яшамиш жезвай ва яргъара авай, четиндаказ физ жедай чкаярни кваз) артухарунин  макьсаддалди гьазурнавай “рекье­рин карта” кардик жедай вахт 2021-йисан эхирдалди давамар хъувун­ва.­­

Адан сергьятра аваз эквайрингдин, яни картайрилай пул алудиз ­же­дай тадаракрин,  абур эцигзавай чкайрин кьадар гзафарун ва республикадин районра финансрин ре­кьяй чирвилер хкаждай цIийи чкаяр ачухун фикирда кьунва.

Къейд ийин, Дагъустан Республикада авай Милли банкуни — Отде­лениди финансрин тешкилатрин кIва­лахдилай агьалияр рази яни, тушни чирун патал ахтармишун баш­­ламишнава. И кардин иштиракчияр тир агьалийри интернетдин еридиз, и ва я маса финансрин къуллугърик тIем акакьуниз, гьакI­ни финансрин рекьяй чирвилер артухаруниз талукь са жерге суалриз жавабар гун лазим я. Анкета ацIу­руни 5 декьикьадилай гзаф вахт кьазвач.

Алатай йисуз и ахтармишуна республикадин 1500 агьалиди иштиракнай. Абурун асул паюнин яшар  35-50 йисаз барабар тир. Хаба­рар кьурбурун 65 процентди  чпихъ банкарихъ галаз алакъалу гьахъ-гьисабар авунин карда са четинвални авачирди къейднай.

Хабарар кьунин серенжем  2021-йисан 1-июлдилай башламишнава ва 10-сентябрдалди давам жеда. И карда Кьиблепатан ва Кеферпатан Кавказдин федеральный округрин вири агьалийривай иштиракиз,  суалриз жавабар  компьютердин ва я мобильный телефондин куьмекдалди гуз жеда, хабар гузва Отделенидин пресс-къуллугъди.

«Лезги газет»