Чи ватанэгьлияр — гьар сана
И мукьвара чаз Санкт-Петербургдин “Пак Лукадин клиникадин азархана” ГБУЗ-да урологиядин отделенидин заведующийвиле кIвалахзавай Руслан Гьуьсейнович Гьуьсейнован пешекарвиликайни тежрибалувиликай хабар хьана.
Руслан 1985-йисан 16-январдиз Тамбовдин областдин Сосновка хуьре духтурдин хизанда дидедиз хьана. Русланан буба Дербент райондин ЛукIарин хуьряй я, диде — Мегьарамдхуьруьн райондин Хъартас-Къазмайрилай.
Махачкъалада медицинадин академия куьтягьай адан буба Гьуьсейн Гьуьсейнов Тамбовдин областдиз кIвалахиз рекье тунай. Русланаз 5-классдал кьван — Сосновкадин, гуьгъуьнлай Дербент шегьердин мектебра кIелдай кьисмет хьана. 2003-йисуз мектеб куьтягьай жегьилди духтурвилин пеше хкягъун кьетIна. ИкI, 2003-йисуз ам Санкт-Петербургдин И. Павлован тIварунихъ галай ГМУ-дин сагъардай факультетдик экечIна.
2009-йисуз ада “сагъарунин кIвалах” пешедай Санкт-Петербург шегьердин медико-технический институт куьтягьна. 2009-2011-йисара Санкт-Петербургда кардик квай И.Мечникован тIварунихъ галай университетда клиникадин ординатурада кIелна.
Винидихъ тIвар кьунвай азарханада ада 2011-йисалай духтур-уролог яз, 2016-йисалай урологиядин отделенидин заведующийвиле кIвалахзава. Шегьерда машгьур хьанвай клиникадин азарханада алай вахтунда са жерге бажарагълу пешекарри, тIвар-ван авай духтурри зегьмет чIугвазва.
И йисара ада пешедин рекьяй тежриба кIватIунин, чирвилер артухарунин мураддалди жуьреба-жуьре машгьур вузра, клиникайра, азарханайра алай девирдин программайрай пешекарвилин дережа хкажна. Алакьунар авай ватанэгьли алай вахтунда урологиядин, нефрологиядин, ультразвуковой диагностикадин ва маса рекьерай шагьадатнамайрин сагьиб, Россиядин урологрин тешкилатдин, урологрин Европадин Ассоциациядин, Россиядин диализный тешкилатдин член я.
Руслан Гьуьсейнова регьбервал гузвай отделенидихъ кIвалахдин рекье агалкьунарни хьанва. Заведующий ятIани, инсанар сагъарунин карда ада вичини датIана иштиракзава, цIийи къайдайрикай менфят къачузва. Отделенидин къуллугъчийри илимдин кIвалахарни кьиле тухузва, адан регьбервилик кваз къуллугъчийрин дестеди гзаф кьадар илимдин макъалаяр кхьенва ва абурун ахтармишунрин нетижаяр уьлкведа, гьакI къецепатан уьлквейрани конференцийрал ва маса мярекатрал раижзава.
Бажарагълу пешекардин къелемдикай медицинадин илимдин 70 кьван кIвалахар хкатнава. Жегьил пешекардин хизанда 9 йисан яшда авай хва тербияламиш жезва. Къуй чи ватанэгьлидихъ кIвалахда, илимда еке агалкьунар хьурай!
К.Ферзалиев
