Гафарин алемдай

Шаирринни писателрин эсеррин чIалариз талукь махсус гафарганар акъудунин рекьяй чахъ еке агал­кьу­нар хьанвач. Лезгийрин маш­гьур пи­са­тель Ме­жид­ Гьажиеван эсерра гьалтай беречи, вервеш, эрибе­ре­яр,­ син­тараш, дим лацу, зупукь, кIвечIех гафари зи фикир чпел желбна. Гафарганра гьат тавунвай уьлчмейриз баянар гунни регьят кар туш. ЯтIани, къалурнавай­ гафариз талукь яз заз жуван веревир­де­риз кIанзава.

Беречи гаф, гьелбетда, бере гафуникай арадал атанва. А.Гуьлмегьамедован гафарганда “бере”­ гафу­низ ихьтин баян ганва: хипер гатуз хуьдай махсус чка. Беречи гьа чкада хиперихъ гелкъвезвай­ хи­­пе­хъан я. Вервеш — хъуьтуьл; жими. “Марини ЦIа­рак, чимивили вервешнаваз, гъилер-кIвачер гьарнихъ яргъи авуна, ахвара авай”. (М. Гьажиев, “Ирид къаш”). Эрибереяр — куьчеридин кIвалин шейэр вири санлай. “Эрибереяр сад-садан къаншарда эцигна­, винелай литер, рухвар аладарна, кьве кIвалин ара­­да къулар эгъуьнна, цIаяр хъийида”. (М.Гьажи­ев, “Им къван, имни терез”). Синтараш — балкIандин кикер дуьзардай, мукалдиз ухшар махсус алат. “Гъи­ле синтараш авай Жабраил са метIел акъ­ваз­­на­ва”. (М. Гьажиев, “Им къван, имни терез”). И гаф Къ.Аки­мован, М.Бабаханован гафарганрани ава.  Дим лацу — лап лацу. (М.Гьажиеван “Ирид къаш” эсердай). Зупукь — ацIай якIарин инсан, сагъ къван хьтин инсан, къуватлуди. (Бязи нугъатра “зубукь” лугьуда).­ “Куь­чедай мус атанатIани чир хьанач, кьве зупукь­ди зун, хъуьчIе­ри­кай кьуна, хкажна, къе­цел акъудна”. (М.Гьажиев, “Ирид къаш”). КIвечIех — хуькуьр; кIве­­­чIехун — хуькуьрун, чалун. “Жабраила лагьайвал, виш йисаралди кIвечIех тавунвай и чIулав накьвадин чилер анжах рамагарни нехирар патал­ ишлемишна”. (М.Гьажиев, “Им къван, имни терез”).

К.КIелетви