Инсандиз шадвал, уьмуьрдилай разивал, руьгьдин таъминвал гузвай чешмеяр гзаф ава: сагъ чан, туькIвей хизан, ферли веледар хьун. СтIал Сулейманан райондин НуьцIуьгърин хуьряй тир тежрибалу къуллугъчи, гьевескар манидар Мегьамедова Закират Замудиновнадин фикирдалди, вини­дихъ лагьай чешмейрилай гъейри, рикI алай пешеди, кIва­лахдини инсандиз руьгьдин таъминвал гуда.

— Закират Замудиновнади нуьцIуьгъвийриз культурадин рекьяй къуллугъ ийиз 35 йисалай виниз я, — лагьана заз «Чи хайи макан — «НуьцIуьгъ» жемиятдин тешкилатдин председатель Загьидин Тажибова. — Ада неинки­ вичин хайи хуьре, гьакIни чи дередин Экенрин, Зизикрин ва КIвар­чагърин хуьрера, районда­ кьиле тухузвай культурадинни шадвилин гзаф мярекатра активвилелди иштиракзава. Идай хуьрерин агьалийри адаз аферин, баркалла лугьузва.

Закират Мегьамедова 1968-йисан 8-февралдиз чIехи ва гьуьр­­метлу хизанда дидедиз хьана. Гьеле школада кIелзавай йи­са­­рилай манияр лугьунал рикI алай руш, школа акьалтIарна, 1987-йисуз Дагъустандин культпросветучилищедик экечIна. 1989-йисуз анаг акьалтIарай Закират НуьцIуьгърин культурадин кIвале художественный руководителвиле кIвалахал эцигна. И везифаяр кьиле тухвай 26 йисуз З. Мегьамедовади ана 12 касдикай ибарат тир гьевескаррин хъсан коллектив, 10-дав агакьна кружокар тешкилна. Кьилди къачуртIа, вич гамарни халичаяр храдай хъсан устад тир ада цIудралди жаван рушариз и милли сеняткарвал чирна.

Районда тухвай художественный самодеятельнострин конкурсра ва фестивалра и хуьруьн гьевескаррин коллективди са шумуд йисуз кIвенкIвечи чкаяр кьуна.

2014-йисалай инихъ Закират Замудиновнади НуьцIуьгърин хуьруьн библиотекадин заведующийвиле кIвалахзава. И везифаярни ада хуьруьнвияр рази жедайвал кьилиз акъудзава.

Лагьана кIанда, вилик йисара библиотекадин дараматда тарифдин къайда авачир. Дарамат куьгьнедини хьайила, ана кIвалах истемишзавай къайдада тешкилиз жезвачир. И кар фикирда кьуна, 2024-йисуз библиотекадин дараматда ремонтрин кIвалахар кьиле тухвана.

Закират Мегьамедовади чаз библиотека цIийи къаматдиз хкуник пай кутур райондин кьил Саид Темирханован, КIварчагърин АСП-дин кьил Завидин Загьирбегован, мергьяматлувилин «Инсан» фондунин, хуьруьнвияр тир Раидин Девришбегован, Къазихан Авчиеван, Загьидин Тажибован, Ярали Загьирован, Луиза Тажибовадин, Злята Калбисеновадин ва масабурун тIварарни гьуьрметдивди кьуна, абуруз сагърай лагьана.

Алай вахтунда библиотекадин фондуна 3844 ктаб ава. Абур кIелзавайбурун кьадар 550-дав агакьзава.

Закират Замудиновнади чаз лагьайвал, библиотекадин кIел­дайбуру районда ва республикада тухузвай конкурсрани иштиракзава, кIвенкIвечи чкаяр кьазва. ИкI, мисал яз, «Шарвили» эпосдиз талукьарна, шиирар кIелунай тухвай конкурсда Наиля Гьажиевади 1-чка кьуна, ам «Умуд» фондунин патай грамотадиз ва 5000 манатдин пишкешдиз лайихлу хьана.

Ремонт хъувурдалай гуьгъуьниз библиотекада гьар жуьредин мярекатар кьиле тухудай мумкинвални хьана. ИкI, 2025-йисуз биб­лиотекада Дагъустандин халкьдин шаир СтIал Сулейманан, писатель Абдулбари Магьмудован, композитор Маина Абдулмуталибовадин, шаир Алибег Фатагьован яратмишунриз ва лишанлу вакъиайриз, суваррин йикъариз талукьарна, СВО-дин иштиракчийрихъ, гзаф аялар авай дидейрихъ галаз тухвай мярекатра хуьруьнвийри активвилелди иштиракна.

Чаз акурвал, библиотекада аквадай агитациядин такьатризни еке чка ганва. «Ватан хуьзвайбурун йис», «НуьцIуьгърин хуьряй тир СВО-дин иштиракчияр», «Афгъанистан — чи рикIера тIал», «Ватандиз къуллугъун намусдин кар я», «Терроризмдиз — ваъ», «Жуван халкьдиз, жуван намусдиз хьиз, вафалу жен», «Дин ва инсан», «Чил чи умуми кIвал я», «ТIебиатди чирзава ва тербия гузва», «Сагълам уьмуьр», «Зи Ватан зи кIанивал, зи дамах я», «Шарвили» эпосдин игитрин гелеваз» ва маса стендри библиотекадиз къвезвайбурун фикир чпел желбзава.

Библиотекада «Культура ва адетар», «Кар алакьдай гъилер» клубар кардик ква, «Библиотекарь» цлан газет акъудзава.

Вири ибур, гьелбетда, Закират Мегьамедовадин яргъал йисарин намуслу зегьметдин нетижа я.

Закират Замудиновна  Дагъустандин гьукуматдин грантдин сагьиб я. Адахъ гьакIни мергьяматлувилин «Умуд» фондунин, райондин культурадин отделдин, ЦБС-дин патай ганвай гьуьрметдин грамотаяр, чухсагъулдин чарар ава.

Хазран  Кьасумов