14-февралдиз Ахцегь райондин РАЭН-дин академик       Э. Эмирбегован тIварунихъ галай Хуьруьгрин хуьруьн умуми образованидин мектебда важиблу мярекат кьиле фена: марифатлувилин ва савадлувилин «Люминари» центрадин куьмекдалди ина аялри чирвилер къачудай цIийи класс ачухна.

РД-дин лайихлу муаллим Магьмуд Абдулкеримован тIварунихъ галай  «Просвещение» фондунин куьмекдалди  ина  неинки класс ремонт авунин кIвалахар ийиз, гьакIни ам алай аямди истемишзавай гьалда тадаракламишиз хьана.

Чирвилер къачудай макандиз, пишкеш яз, 15 ноутбук, интерактивный кьул, принтерар ва образование гунин гьерекатдин ерилувал хкажун патал лазим маса такьатар ганва.

ЦIийи класс ачухун лишанламишзавай яру лент атIудай гьуьрметдин ихтияр «Просвещение» фондунин президент Магьмуд Абдулкеримоваз, Ахцегь райондин кьил Абдул-Керим­ Палчаеваз ва мектебдин директор Лаура Гьажиевадиз гана. Шад мярекатда гьакIни школадин муаллимрин коллективди, ана кIелзавай аялри ва абурун диде-бубайри иштиракна.

Къейд ийин хьи, «Просвещение» фондуни муниципалитетдихъ галаз бегьерлу алакъаяр фадлай хуьзва. Ада гьар йисуз  Ахцегь райондин муаллимрин арада тешкилзавай «Йисан муаллим»  конкурсдин спонсорвални ийизва, райондин мектебар компьютеррин техникадалди тадаракламишунин кадра куьмекар гузва.

Фонд вичин тIварцIихъ галай Магьмуд Абдулжелилович Абдулкеримов еке тежриба ва виниз тир пешекарвал авай муаллим я. Лайихлу пенсияда аваз, ада образованидин хел еримлу авунин кардик вичин пай кутунин кIвалах давамарзава. Мярекатдал рахадайла, ада муаллимриз ва аялриз цIийи класс ачухун тебрикна ва мектебда кIелзавай аялрихъ гележегда еке агалкьунар хьунин чими келимаяр лагьана.

Адул-Керим Палчаева райондин агьалийрин патай Магьмуд Абдулжелиловичаз ва адан рухвайриз ачух гъилелди авунвай пишкешрай, гьакIни Ахцегь райондин образованидин къурулушдиз датIана куьмек гунай  сагърай лагьана.

Жасмина Саидова