14-февралдиз Рутул райондин Хъуьлуьдрин хуьре Россиядин Игит, гвардиядин полковник Мегьамедали Мегьамеджанов рикIел хкуниз талукьарнавай мярекат кьиле фена.
РикIел хкин, чи кьегьал ватанэгьлиди Украинада кьиле физвай махсус серенежемда иштиракзавай. 2024-йисан 14-февралдиз ам дяведин гьерекатра хьанвай залан хирерикди Севастополдин госпиталда телеф хьана. Офицерди а чIавуз 18-армиядин регьбердин заместителдин везифаяр тамамарзавай.
Игит рикIел хкунин мярекатда Рутул райондин кьил Давуд Сулейманова, телеф хьайи офицердин мукьвабуру, жемиятдин векилри ва масабуру иштиракна.
Вичин рахунра Хъуьлуьдрин хуьруьн администрациядин кьил Даир Ашурбегова Мегьамедали Мегьамеджанован тIвар гьамишалугъ халкьдин рикIера амукьдайди ва хъуьлуьдвийри чпин кьегьал векилдал лайихлудаказ дамахзавайди къейдна.
М.Мегьамеджанован хендеда Муслимат Мегьамеджановади мярекат тешкилайбуруз сагърай лагьана. «Мегьамедалидин экуь къамат инсанрин рикIера амукьун чи хизан патал лап важиблу я. Ада вичи чи уьлкведин ва хайи халкьдин пакадин югъ экуьди, бахтлуди хьун патал къуллугъзава лугьудай. Къе чаз адан кьегьалвилер рикIелай алуд тийизвайди аквазва», — къейдна ада.
Гаф кватай чкадал лугьун хьи, мукьвара бине Рутул райондин Кичерин хуьряй тир лезги шаир Саид Гьуьсейнова Мегьамедали Мегьамеджанован экуь къаматдиз бахшнавай «Хъуьлуьдрин гъед» тIвар алай ктабни чапдай акъудна. И делилди Игитдин тIвар халкьдин рикIера авайди нубатдин сеферда тестикьарзава.
Чи мухбир
