Игъирар. Ам Ахцегь райондин виридалайни эхиримжи хуьр тир. Гьавиляй адаз гагь Ихир, гагь Эхир лугьузва. Алай вахтунда анин тIвар са картадални аламач, гьукуматдин къарардалди анин агьалияр Къурушар, Мацар, КIурукIнар хуьрерин агьалийрихъ галаз санал Хасавюрт райондиз куьчарна, ина еке хуьр арадал атана.
Магьизар Агъаселимовна Игъира 1939-йисуз дидедиз хьана. Хуьре бегьем мектеб авачир. Яшайишдин шартIарни четинбур хьуниз килигна, абурун хизан Ахцегьиз куьч хьана.
1-7-классар ада Ахцегьа кIелна. Ина чирвилер къачузвай чIавуз адаз урус чIални литература — Родонская-Мирзоева Мария Дмитриевнади, математикадин тарсар Вера Архиповна Халикьовади гана. И жегьил рушар Дагьустандиз Урусатдай атанвайбур тир. Чпин чирвилер, рикIерин чимивал ва тежриба хуьрерин аялриз багъишай абуру халисан игитвал къалурнай.
Магьизаран рикIелай къени абур, гайи тарсар, тербия, чирвилер алатзавач. Сифте яз аялриз Пушкинакай, Лермонтовакай ва маса классикрикай авур суьгьбетар гьамишалугъ яз рикIел алама, абуру адаз эдебият кIанарна. Руша вичиз и пеше (муаллимвал) аял чIавалай хкянай.
1958-йисуз абурун хизан Хасавюрт райондин Къурушрин хуьруьз куьч хьана. Руша цIийи хуьруьн школа хъсан къиметар аваз куьтягьна. 1960-йисуз Магьизаран мурад кьилиз акъатна — адакай ДГПИ-дин филологиядин факультетдин студентка хьана.
Чирвилерал гзаф рикI алай дагъви руша 1965-йисуз институт агалкьунралди куьтягьна, хайи хуьре муаллимвилин кIвалах башламишна.
“Аялриз тарс гун, абуруз предмет чир хьун патал муаллимдиз вичизни гзаф чирвилер хьана кIанда”, — лугьузва Магьизар Агъаселимовнади. Гьавиляй ада датIана вичин чирвилер хкажзава, предметдиз талукь журналар кIелзава. Магьизар Агъаселимовнади сифтени-сифте вичи тарсар гузвай аялриз къулай шартIар яратмишун патал школада урус чIалан кабинет кардик кутуна, ТСО-яр, таблицаяр, цлан газетар, чIехи классикрин шикилар алай стендар туькIуьрна.
1975-йисуз Магьизар Агъаселимовнадин хизан Хасавюрт шегьердиз куьч хьана. Вичин кIвалах ина 3-нумрадин мектебда давамарай адан тежриба акур урус чIаланни литературадин муаллимри ам чпин методикадин тешкилатдин регьбервиле хкяна.
Муаллимди вичин кIвалахда чирвилер ва тербия гунин кIвенкIвечи тежриба ишлемишна, тухузвай тарсар лекцийриз, семинарриз, конкурсриз, конференцийриз, элкъвей столриз, адетдинди тушир тарсариз элкъуьрна. Ада школада сифте яз литературадин межлисар, КВН-ар, конкурсар тухуз хьана. Аялриз вичин предметар (урус чIални, литература) кIанарна. Магьизар Агъаселимовнадин аялри республикада урус литературадай кьиле тухузвай олимпиадайра сад лагьай чкаяр кьуна.
Заз чиз, муаллимдин пешедин машгьурвал, адаз ийизвай гьуьрмет садрани агъуз аватдач. Муаллимдин тIвар ада тарс гайи аялрин рикIера эбеди яз амукьда.
Гьакъикъатдани, Магьизаракай адахъ галаз кIвалахай юлдашар, къуни-къуншияр, ада тарс гайи аялар разивилелди рахазва. Ам кьилин дережа авай муаллим я. Муаллим ва классдин руководитель яз кIвалахзавай йисара, ада са шумуд несилдиз чирвилер гана, уьмуьрдин шегьредал акъудна.
Лугьун лазим я хьи, Магьизар Агъаселимовна Игъиррин хуьре кьилин образование къачур сад лагьай дишегьли я.
Вичин уьмуьрдин юлдаш Эскеров Бедрединахъ галаз санал абуру хъсан хизан арадал гъана. Веледриз кьилин образование гана. Алай вахтунда вирида гьукуматдин идарайра кIвалахзава. Руш Наримади Тюмендин областдин Когалым шегьерда, ингилис чIалан муаллим яз, дидедин пеше давамарзава. ЧIехи гада Марата “Газпромда” отделдин начальниквиле кIвалахзава. ГъвечIи хва — Далгат — карчи я. Абурухъ чпин туькIвей хизанар ава.
Яргъал йисарин бегьерлу зегьметдай адаз “РФ-дин умуми образованидин гьуьрметлу работник”, “РД-дин образованидин отличник”, “В.И. Ленинан 100 йис” медаль ва гзаф кьадар грамотаяр ганва.
2012-йисуз пенсиядиз экъечIай муаллимдин 82 йис ятIани, адаз секинвал чидач, вичин тарсар кIвале авай хтулриз гузва.
5-октябрь муаллимрин сувар ва Магьизар Агъаселимовна хайи югъни я. Чна адаз и вакъиаяр виликамаз мубаракзава. Къуй адахъ чандин сагъвал, яргъи уьмуьр, рикIин секинвал хьурай!
Ася Абасова-Гьафизова,
образованидин отличник,
Хасавюрт шегьер
