Сулейман-Стальский райондин кьил Нариман Абдулмуталибова мукьвара агьалийрин сагъламвал хуьнин карда гьакъисагъ ва намуслу зегьметдай, КIварчагъ дередин хуьрера сагълам уьмуьр пропаганда авуник еке пай кутунай Экенрин хуьруьн фельдшервилинни акушервилин пунктунин (ФАП-дин) медсестра Наврузова (Умеренко) Наталья Ивановнадив Гьуьрметдин грамота шад гьалара вахкана.
— Дагъустанвияр савадлу хьуник урус халкьдин векилри — пешекарри еке пай кутурди я, баркаллу и кардай чна абуруз чухсагъул лугьузва. — Абурукай гзафбуруз ХХ асирдин Гомер СтIал Сулейманан тIвар алай райондикай кьвед лагьай ватан хьана, абуру чпин кьисметар чи районэгьлийрихъ галаз сад авуна, кIвал-югъ, хизанар кутуна. Вилик девирра башламиш хьайи и кар Наталья Ивановна хьтин ксари чи йикъарани давамарзава, — къейдна, грамота вахкудайла, Н. Абдулмуталибова.
Шадвилин мярекатдилай гуьгъуьниз чун Наталья Ивановнадихъ галаз таниш хьана, уьмуьрдин рекьикай, кьадар-кьисметдикай ихтилатар авуна.
Малум хьайивал, адан ери-бине Ставрополь шегьердай я. Н. Наврузовади 2002-йисуз Ставрополдин медколледждин “сестринское дело” факультет хъсан чирвилер аваз акьалтIарна. Зегьметдин рехъ шегьердин 4-нумрадин больницада рентген-диагностикадин отделенида рентген-лаборант яз кIвалахунилай башламишна. Гуьгъуьнлай ада Ставрополдин 6-нумрадин клинический поликлиникада, клинический краевой больницада медсестравиле кIвалахна. Са шумуд йисуз Наталья Ивановнади шегьердин аварийринни къутармишунрин дестейрин регьбер язни кIвалахна. Адан намуслу зегьмет Ставропольский крайдин здравоохраненидин министерстводин, шегьердин кьил Н. Пальцеван, ада кIвалах авур поликлиникайрин гьуьрметдин грамотаяр, “крайдин амбулаторийринни поликлиникайрин лап хъсан медицинадин работник” гьуьрметдин тIвар гуналди къейдна. Ам шегьердин медицинадин пешекаррин конкурсдин гъалибчини я.
Гуьгъуьнлай Наталья Ивановнадини КIварчагърин хуьряй тир Амрудин Наврузова чпин сирер сад авуна, интернациональный хизан кутуна. Абур Дагъларин уьлкведин гуьзел пипIерикай, Сулейман-Стальский райондин безек къашарикай сад тир КIварчагъ дередиз хтана.
2015-йисалай инихъ Наталья Наврузовади Экен хуьруьн ФАП-да медсестравиле кIвалахзава.
— Наталья Ивановна, куьн лезги хизанда, лезги хуьре гьикI кьабулна? — хабар кьуна за.
— Дуьз лагьайтIа, за жув, урус миллетдин векил, лезги хуьре, кIвале икI гьуьрметлудаказ кьабулда, заз гьуьрмет ийида лагьана фикирнавачир, — сивел хъвер алаз лугьузва Наталья Ивановнади. — Лезгияр мугьманперес, рикI ачух халкь я. Куьчеда гьалтайла, гъвечIидани, чIехидани салам гуда, гуьгьуьл къачуда. Зун зи кьисметдал рази я, за жув бахтлу кас яз гьисабзава.
Эхиримжи йисара Экенрин хуьре хазвай аялрин кьадар гзаф, начагъвилер авай аялрин кьадар лап тIимил хьанва. Им Наталья Ивановнадин чирвилерин, кIвалахдин нетижа яз гьисабиз жеда.
— Наталья Ивановна, хъсан чирвилер, тежриба авай медсестра хьиз, хъсан къилихрин, михьи рикI авай инсанни я, — лугьузва райондин центральный больницадин кьилин духтур Максим Ханбалаева. — Инсанвилин ерийралди ва намуслу зегьметдалди ада КIварчагъ дередин агьалийрин ва медработникрин патай гьуьрмет къазанмишнава. Адан кIвалахдилай чун гзаф рази я.
Н. Наврузовадихъ галаз ихтилатар ийидайла, зи рикIел Платона лагьай гафар хтана: “Масабурун бахтунин къайгъуда авайдаз жуван бахтни жагъида”. Наталья Ивановна масабурун бахтунин къайгъудани ава. Гьавиляй адаз КIварчагъ дереда, лезги хуьре вичин бахтни жагъанва.
Хазран Кьасумов
