“Гьар пешедихъ вичин гуьзелвал ава”, — лагьанай лезгийрин машгьур писатель М.Гьажиева. Амма “виридалайни” гафунихъ галаз, са шакни алачиз, анжах муаллимвилин пеше алакъалу ийиз жеда: виридалайни важиблу, виридалайни четин, виридалайни асуллу, виридалайни герек, виридалайни баркаллу, виридалайни жавабдар…
Акьалтзавай несилдин гележег муаллимрилай гзаф аслу я. Аялрин гележег экуьди, генгди, агалкьунар галайди хьун патал муаллимди вичин пеше адетдин кIвалахдиз ваъ, майилвилиз элкъуьрзава. Гьакъисагъвилелди зегьмет чIугвазвай, чпихъ гзаф йисарин тежриба хьанвай муаллимар чи мектебрани тIимил авач. Докъузпара райондин Къалажухрин мектебда фадлай кIвалахзавай Маиса Гьажимурадовна Исабалаевани гьа ихьтинбурун жергедай я.
Маиса 1974-йисан 5-февралдиз Мегьарамдхуьруьн райондин Гъепцегьрин хуьре дидедиз хьана. Ана 8-класс куьтягьайдалай кьулухъ, 1989-йисуз, Дербентдин педучилищедик экечIна. Муаллимвилин пеше къачур Маиса Гьажимурадовнади са шумуд йисуз хайи мектебда гъвечIи классриз тарсар гана.
Кьисметди Къалажухрин хуьруьз акъудай Маиса Исабалаевади 2000-йисалай вичин рикI алай пешедай кIвалах давамар хъувуна.
Акьалтзавай несилдиз чирвилер ва тербия гунин карда къазанмишнавай агалкьунриз, гзаф йисарин бегьерлу зегьметдиз килигна ам 2009-йисуз РД-дин образованидинни илимдин министерстводин грамотадалди къейдна.
Акьалтзавай несилдиз чирвилерни тербия гунин карда лайихлувилерай 2010-йисуз ам Докъузпара райондин а чIаван кьил Керимхан Абасован патай гьуьрметдин грамотадизни лайихлу хьана. 2012-йисуз адаз РФ-дин умуми образованидин гьуьрметлу работник лагьай тIвар, бажарагълу жегьилриз куьмекдай центрадин патай урус чIалай олимпиададиз гьазурвал акунай ва кьиле тухунай анин директор Р.Фролован грамота, 2018-йисуз математикадин хиляй датIана образование вилик тухунин Москвадин центрадин директор И.Ященкоди урус чIалайни математикадай вирироссиядин ахтармишунрин кIвалахар тухунин карда иштиракунай чухсагъулдин чарар гана.
Амма М.Исабалаевади виридалайни чIехи награда вичин ученикрикай пешекарар хкатун яз гьисабзава. Ада чирвилер гайи хейлин ученикрикай жуьреба-жуьре пешейрин иесияр хьанва. Бязибуру муаллимвилин пеше хкяна, мектебда тарсар гузва. Гьелбетда, ибур муаллимдин гьакъисагъ зегьмет бегьерлуди хьайивилин ва мадни хъжедайдан гьакъиндай шагьидвалзавай делилар я.
Гзаф йисара муаллимвилин регьят тушир кIвалах гьакъисагъвилелди тамамарай ва агалкьунралди давамарзавай Маиса муаллим алай йисан январдилай “Зегьметдин ветеран” шагьадатнамадин иесини я. Къуй тежрибалу муаллимдин зегьмет гележегда мадни бегьерлуди хьурай!
Куругъли Ферзалиев
