7-майдиз чи уьлкведа радиодин югъ къейдзава. Радиодин юкъуз, гьакIни Гъалибвилин суварин сергьятра аваз, Докъузпара районда «Эренлардин сес» тIвар алай чкадин радио ачухунин шад мярекат кьиле фена.

Ана Докъузпара райондин кьил Абдурагьим Алискерова, адан заместителри, «Дагъустан» ГТРК-дин лезги чIалал телерадиовещанидин чIехи редактор Наира Рамазановади, редактор Нарима Жамаловади, «Дагъустан» ГТРК-дин телевиденидин оператор Мегьамед Мегьамедханова ва масабуру иштиракна.

Докъузпара райондин кьил Абдурагьим Алискерова районда чкадин радио кардик акатун важиблу вакъиа тирди къейдна. «Къе, радиодин юкъуз,  чи районда ихьтин лишанлу вакъиа кьиле физва. Лезги радиоди агьалийриз райондин ва маса жуьреба-жуьре хабаррихъ яб акалдай мумкинвал гуда», — лагьана райондин кьили.

Хайи чIал, милли меденият хуьнин карда радиодихъ метлеб авайди къейдунихъ галаз сад яз, райондин кьили кIватI хьанвайбуруз радиодин югъни, 9-Майдин суварни мубаракна.

Шад мярекатдал Наира Рамазанова ва Нарима Жавамаловани рахана. Абуру чеб Докъузпара районда кьиле фейи лишанлу вакъиадин иштиракчияр хьуниз килигна разивал малумарна, радиодин кIвалах вилик тухунин карда алакьадай куьмек гуз гьазур тирдакайни лагьана. Эхирдай районэгьлийриз суварин тебрикдин гафарни лагьана.

Шад мярекатдал райондин кьил Абдурагьим Алискерова, вини дережадин пешекарвилиз, гзаф йисарин бегьерлу зегьметдиз килигна ва Россиядин радиодин йикъагъ галаз алакъалу яз, Наира Рамазановадив, Нарима Жамаловадив ва Мегьамед Мегьамедхановав грамотаяр вахкана.

«Лезги газет»