Астрологрин гафаралди, Пеленг вичин къилих авай, мукъаятлувал квай, амма садлагьана дегиш жедай гьайван тирвиляй санлай йис бегьерлуди ва хъсанди хьуник еке умудар кутаз жеда. Хъсан патахъ дегишвилер гьар садан кIвалахда, уьмуьрда, сагъламвилел гьалтайлани, жедайдахъ инанмишарзава абуру. ИкI, фадлай пландик квай, амма яргъалди кьилиз акъудиз тежезвай ва я чеб, четинбур хьу­низ килигна, гадарнавай крар Пеленгдин йисуз кьилиз акъатда.

Иллаки яратмишунрал машгъул ксар патал йис туькIвейди жеда. Амма финансрин жигьет­дай йисан сифте кьиляй мукъаятвал ва къанажагълувал квадарна виже къведач, тахьайтIа, садлагьана са кар ийиз жуьрэтдай гьайванди инсан кIеве тун мумкин я. Пеленгдин йис хизанрин арада алакъаяр мягькемардайди ва мягькем хизанар арадал атуниз куьмекдайди жеда. Пеленг мягькем сагъламвал авай гьайван я, гьаниз килигна, инсанрини и йисуз викIегьвал, беденда къуватар артух хьанвайди гьиссда. Астрологри мадни къейдзава:

Цимил кьифрен

йисуз ханвай ксарихъ уьмуьрдин вири терефрай яргъалди чеб гуьзлемишай агалкьунар, гьатта кIвалахдин жигьетдайни еке четинвилер аваз виликди тефизвай крарни кьилиз акъуддай мумкинвал жеда. Пеленгди пешекарвилин ерияр хъсанаризни, уьмуьр активламишунизни куьмекда. Куьрелди, и йисуз секин Цимил кьиферин бахтуни гъида.

Жунгавдин

йисуз ханвай ксарикай анжах виликди физ ва жуван устадвал хкажиз чалишмиш жезвайбур патал Пеленгдин йиса еке мумкинвилерин ракIарар ачухда. Алава яз, жунгавдин йисуз ханвайбуруз Пеленгди амалдарвиликайни са тIимил пай гуда, идани абурун крар кьилиз акъудуниз куьмекда.

Пеленгдин

йисуз ханвайбурув Пеленгди вичин къаюмвал, хатурлувал виридалайни гзаф агакьарда. Абуруз гьар са хиляй чпин устадвал ва алакьунар къалурдай, неинки алай йисуз, гьакI яргъал гележегдин планар кьилиз акъудуниз талукь крарал гьалтай­лани, еке мумкинвилер ачухда. Амма гьар са кар кьилиз акъуддайла, мукъаятвал квадар тавуни абур агалкьунрин еке кукIушрив агакьарда.

Къуьрен

йисуз ханвай ксарин патав Пеленгдин йисуз душманар ваъ, хуш ва рикIе къе­ни ниятар авай ксар жеда, абуру гьар са карда куьмекда, гьакIни рикI аладарда.­ Кьилинди, патав гвай ксариз куьнени куьмек гун лазим тирди, абуруз жуван патай куьмек агакьариз гьазурлухвал къалуризни рикIелай ракъур тавун я. Анжах рикIин михьивал ва къенивал авай ксаривай Пеленгдин йис хъсандиз кьиле тухуз жеда.

Аждагьандин

йисуз ханвайбуру анжах чпин менфятлувал, акьуллувал ва сабурлувал къалуруналди Пеленг чпив хушвал ва дуьзгуьнвал гваз эгечIуник умуд кутаз жеда. Гьар са карда “къизилдин юкь” жагъурун герек я. ЦIийи крарив  рикI  ва ачух ниятар гваз эгечIуни, инсанди вичин чирвилерин дережа (кругозор) гегьеншарунини хийир квай планар кьилиз акъудуниз куьмекда.

Гъуьлягъдин

йисуз ханвайбуру ЦIийи йис важиблу крар тайинарунилай  ва ял ягъуниз артух фикир гунилай башламишна кIанда. Пеленгди абур патал цIийи са вуч ятIани регьятдаказ, азаб алачиз, амма бажарагълувал хкажуниз екез куьмекдай мумкинвилер яратмишда.

БалкIандин

йисуз ханвайбур патал йисан сад лагьай пай са тIимил четинди жеда. Пеленгди абуруз “манийвилер квай чамарар” тешкилда, амма зегьметдал рикI алай ва виликди финин еке планар авай БалкIандилай и имтигьанрай лайихлудаказ экъечIиз хьуни Пеленг мягьтеларда  ва хъуьтуьларда. Кьилинди, къарарар кьабулдайла, мукъаятвал квадар тавун я.

ЦIегьрен

йисуз ханвайбур — гьакъисагъвал, селигъалувал авай ксар — йисан сагьибдиз гзаф хуш я, гьавиляй абур патал секин вахт алукьда. Пеленгди абуруз чпин къуватар артухардай ва къенепатан гармония арадал гъидай мумкинвилер артухарда. ТIебиатдал ял ягъун, сиягьатун ва жуван винел кIвалахун — ибур ЦIегьер патал кьилин крариз элкъведа.

Маймундин

йисуз ханвайбуруз виликамаз хабар гузва: аставилихъ галаз чара хьана кIанда, вучиз лагьайтIа, вакъиаяр лап йигин тегьерда кьиле фида. Амма тади авунни герек туш, гьар са кам вегьедалди фагьум-фикирна кIанда. Иллаки финансрихъ галаз алакъалу крара тадивал акатна виже къведач. Пеленгди “къайи” акьул истемишзава. И шартIар кьилиз акъудиз алакьайтIа, йис регьятди жеда, са жерге планризни экуь дуьнья аквада.

КIекрен

йисуз ханвай ксар тамун гьайванди иесивалзавай вахтуни сабурлувал, са чкадал ацукьун истемишзава. Амма им йис секинди ва рагъулвал квайди жеда лагьай гаф туш. Мукьвал-мукьвал жедай мумкинвилери Пеленгдин йисуз абуруз сиягьатдай, кIвалахдин рекьяй вилик фидай мумкинвал гуда. Кьилинди, мукъаятвал хуьн я. Пеленгдиз камаллубур, гьар са кам фагьум-фикирдайбур кIандайди рикIелай ракъур тавун герек я.

КицIин

йисуз ханвайбур патал йис агалкьунринди жеда. Гьар гьихьтин хьайи­тIани четин­вилер абуру регьятдиз алудда, эгер тади тавуртIа. Идалайни гъейри, абуруз йисан Сагьибди тIебиатди ганвай бажарагъ винел акъуддай мумкинвилерни яратмишда. Кьилинди, Пеленгди дугъри ва ниятар михьи инсанриз гьар са карда куьмекда.

Къабандин

йисуз ханвай ксар патал йисан сад лагьай пай активнидаказ фагьум-фикирдайди жеда. Жуван уьмуьрдикай, кьилин ва яргъалди кьилиз акъудун лазим къвезвай ва алай йисуз кьилиз акъудун лазим тир планар тайинарна кIанда. Пеленгди сифтедай­ секинвал гуда абур лазим чкайрал эцигун патал, ахпа лагьайтIа, абурук са тIимил юзун кутада. Нетижада йисан эхирдив абур еке бегьер гваз агакьда.

Регина Семедова