Пехилвал — им инсандиз вичин мусурман стхадиз, вахаз Аллагьди нямет гана такIан хьун, акси яз, ам адакай магьрумун кIан хьун я. ТакIанвал лагьайтIа, им инсанрин арада авай алакъаяр чIурун, абуруз душманвал авун я.
Пехилди адалат гвачир, я инсафни авачир касдиз лугьуда. Ада садазни регьимдач ва садни секиндиз тадач. Пайгъамбарди (с.а.с.) лагьана: “Вири гунагьрин бине пуд шей я, куьн абурувай яргъа хьухь. Куьн такабурлувиликай яргъа хьухь, гьакъикъатда ада иблисдиз Аллагьдин эмирдиз муьтIуьгъ жез манийвална. И кар себеб яз ада Адамаз сужда (икрам авун) авунач. Къизмиш гьевесривай яргъа хьухь, гьакъикъатда абуру Адамав къадагъа авунвай емиш нез туна. Пехилвиливай яргъа хьухь, гьакъикъатда Адаман са хци (Къабила) вичин стха (Гьабил) пехилвиляй яна кьейиди я”.
Аллагь-Таалади Сулейман пайгъамбардиз лагьана: “Зи михьи тир лукIарикай гьич садрани пис рахамир ва гьич садрани абурал пехилни жемир”. Са савадлу касди лагьана: “Аллагьдиз вичин лукIрал инсафсуз душман гьалдариз кIан хьайила, адал пехилди ракъурзава”.
Пехилвили мусурманрин дин тергзава, пехил касдин рикIе диндин гьич гелни амукьзавач, адан рикIе мичIивал, гьакъикъатдиз манийвал гун арадал къвезва.
Чи играми Пайгъамбарди (с.а.с.) лагьана: “Квел виликан уьмметрин уьзуьрар агакьна: пехилвал ва такIанвал… Са зурба алимди агакьарна: “Пуд жуьре инсанрин тIалабунриз Аллагьди жаваб гудач: гьарамди незвайдан, чарабурукай пис рахазвайдан (гъибет), мусурманрал пехил ва абуруз писвал хьана кIанзавайдан”.
Асгьабри хабар гайивал, пехил кас инсандивай сакIани рази ийиз жедач. Муавията лагьана: “Завай вуж хьайитIани рази ийиз жеда, пехилдалай гъейри. Ам анжах зун няметрикай магьрум хьайитIа, рази жеда”. Имам аш-Шафииди лагьаналда: “Гьихьтин душманвал хьайитIани, ам акьалтIда лагьана, умуд ава, пехил касди ийизвай душманвилелай гъейри”.
«Ас-салам» газетдай
