И сеферда чи ихтилат фармацевтикадин илимрин кандидат, Пермдин гьукуматдин милли университетдин биологический затlарин илимдинни ахтармишунрин лабораториядин заведующий, ПГФА-дин инсандин экологиядин ва хатасузвилелди уьмуьр тухунин кафедрадин доцент, А.Фридманан тlварунихъ галай медалдин сагьиб, тlвар-ван авай чи ватанэгьли Рамиз Рагъибович Магьмудовакай я.
Ам Сулейман-Стальский райондин Агъа Стlалрин хуьре дидедиз хьана. Юкьван мектеб агалкьунралди куьтягьайдалай кьулухъ гележегдин алим Астрахань шегьердиз рекье гьатна ва ана медицинадин училищедик экечlна. 1980-йисуз училище куьтягьна, ам Пермь шегьердиз фена, ана университетдин химиядин факультетдик экечlна.
РФ-дин Яракьлу Къуватрин жергейра къуллугъ кьилиз акъудна хтайдалай кьулухъ, алакьунар авай 2-курсунин студент яз, ам ПГНИУ-дин биологиядин активный за-тlарин лабораторияда кlвалахал акъвазна.
Са шумуд йисуз илимдал машгъул хьайи Р.Магьмудова, гзаф йисара ахтармишай кlвалахрин нетижаяр агудна, 1998-йисуз “Синтез и биологическая активность производных 4-замещённых 2,4-диоксо- бутановых кислот и гетероциклических соединений, полученных на их основе” темадай кандидатвилин диссертация хвена.
РФ-дин илимдин лайихлу деятель, профессор, химиядин илимрин доктор Юрий Андрейчикован ва доцент, медицинадин илимрин кандидат Е.Пидэмскийдин регьбервилик кваз чи ватанэгьлиди гьайванрал илимдин сифте тежрибаяр тухвана. Лабораториядин жергедин къуллугъчи хьиз кlвалахдив эгечlай Рамиз Магьмудовакай са куьруь вахтунда ПГНИУ-дин тlебии илимрин институтдин илимдинни ахтармишунрин лабораториядин заведующий хьана. И къуллугъдал ада 2002-йисалай къениндалди агалкьунралди кlвалахзава. Химиядин рекьелди талукь тир ахтармишунар тухвайдалай кьулухъ цlийиз арадал гъизвай дармандин бине Рамиз Рагъибовичан лабораторияда кутазва. Дарман арадал гъун патал вишералди, агъзурралди химиядин затlар ахтармишзава. Ахтармишунрин университетда ада 2 агъзурдалайни гзаф цlийи продуктрик биологический менфятлу затlар кIватlна, ахтармишна. Ахтармишай материалрай ада авторвилин 5 шагьадатнама ва цlийи затl арадал гъун патал 16 патент къачуна. Р.Магьмудов 160-далайни гзаф илимдин макъалайрин ва монографийрин автор я.
2010-йисуз Р.Магьмудован ахтармишунрин кlвалахриз еке къимет гана — адакай ПГНИУ-дин лап хъсан изобретатель хьана. Са гафуналди, чи ватанэгьли и университетдин дамах я. Кlвалахдин юлдашрин ва студентрин арадани адаз еке гьуьрмет ава. Къуй адахъ мадни зурба агалкьунар хьурай!
Гьазурайди — Куругъли Ферзалиев
