13-январдиз республикадин меркезда Россиядин печатдин югъ къейд авунихъ галаз алакъалу са жерге мярекатар кьиле фена. Ислен йикъан пакамахъ РД-дин Гьукуматдин Председатель Абдулмуслим Абдулмуслимов Дагъустандин СМИ-рин векилрихъ — гьам печатдин ва гьам электронный газетрин ва журналрин, информациядин агентствойрин, гьа жергедай яз федеральный изданийрин регьберрихъ ва журналистрихъ, военный корреспондентрихъ галаз гуьруьшмиш хьана.
Мярекатда РД-дин Гьукуматдин Председателдин заместитель Рамазан Жафарова, РД-дин Халкьдин Собранидин комитетдин председатель Фирудин Ражабова, гьакIни са жерге министерствойрин векилри ва депутатри иштиракна.
Гуьруьш башламишдалди вилик Абдулмуслим Абдулмуслимов дараматдин дегьлизда ачухнавай ктабрин ва газетрин выставкадихъ галаз таниш хьана.
Шад мярекат премьер-министрди РД-дин Кьил Сергей Меликован патай пешекар сувар тебрикунин гафар агакьарунилай башламишна.
«Дагъустандин печатдин югъ чна уьлкведин журналиствилин жемият патални муракаб шартIара къаршиламишзава. СВО-дин мулкара чпин везифаяр тамамарзавай репортерар иллаки четин шартIара ава. Чпин уьмуьр хаталувилик кутуна, абуру, Ватандин ЧIехи дяведин вахтунда хьиз, информациядин фронтда чи аскеррихъ галаз санал къуллугъзава», — къейдна А.Абдулмуслимова.
Тебрикдин келимайрилай кьулухъ А. Абдулмуслимова государстводин шабагьар вахкуз башламишна. Кьилди къачуртIа, военный корреспондент Омар Мегьамедоваз, «Дагъустан» ГТРК-дин журналистар тир Фатима Гьуьсейновадиз, Наталья Алипулатовадиз, «Дагъустан» этномедиахолдиндик акатзавай ва милли редакцийра кIвалахзавай 30-дав агакьна журналистриз, гьа гьисабдай яз «Лезги газетдин» экономикадин отделдин редактор Жасмина Саидовадиз Дагъустан Республикадин Гьукуматдин гьуьрметдин грамотаяр гана.
Гьа и юкъуз Махачкъаладин печатдин ва информациядин Агентстводин залда Россиядин журналистрин Союздин Дагъустандин региондин отделениди пешекар суварихъ галаз алакъалу яз тешкилнавай прессадин бал кьиле фена. Мярекатдин сергьятра аваз, алатай йисан конкурсра гъалиб хьайи, гьакIни зегьметда тафаватлувал къалурай республикадин СМИ-рин векилриз гьуьрметдин грамотаяр, пишкешар, шабагьар гана.
Россиядин журналистрин Союздин Дагъустандин региондин отделенидин регьбер Мегьамед Ибрагьимова тебрикдин келимаяр лагьайдалай кьулухъ СМИ-риз талукь проектар кьилиз акъудиз куьмек гузвай меценатар тир Имам Яралиев ва Марат Алияров Россиядин журналистрин Союздин гьуьрметдин грамотайриз лайихлу хьанвайди къейдна.
Гуьгъуьнлай ада республикадин «Дагъустандин къизилдин къелем — 2024» конкурсдин 4 номинациядай гъалибчияр малумарна: Сабина Исрапилова («Дагестанская правда»), Низами Гьажибалаев «ТАСС-Кавказ»), Руслан Сафарбегов (Дагъустандин Огни шегьердин администрация) ва Нарима Жамалова («Дагъустан» ГТРК-дин лезги радио). Абурув шабагьар РД-дин Гьукуматдин Председателдин заместитель Нариман Абдулмуталибова вахкана.
Прессадин балдин сергьятра аваз, РФ-дин Государстводин Думадин депутат Жамалдин Гьасанова 2023-йисалай инихъ гьар йисуз, милли пресса хуьник къуьн кутунин лишан яз, милли газетрин векилриз пулдин премияр гузва. ИкI, и сефердани депутатдин куьмекчи Наби Юсупова 13 редакциядин векилриз, гьа жергедай яз «Лезги газетдин» яшайишдин ва чарарин отделдин редактор Рагнеда Рамалдановадиз Чухсагъулдин чарар ва 10 агъзур манатдин кьадарда аваз пулдин пишкешар гана. Ада депутатдин патай пулдин пишкешар (20 агъзур манат) «Дагъустандин къизилдин къелем — 2024» конкурсдин гъалибчийривни вахкана.
Амай пишкешрин арада мад сад — «Лезги газетдин» редактор Мегьамед Ибрагьимоваз Россиядин писателрин союздин патай гайи Василий Шукшинан къизилдин медаль — кьетIендаказ къейд ийиз кIанзава. Шабагь адав Дагъустандин писателрин союздин председатель Марина Агьмедова-Колюбакинади вахкана.
Суварин юкъуз Махачкъала шегьердин мэр Юсуп Умавов республикадин ва федеральный кар алай СМИ-рин векилрихъ галаз шегьердин са ресторанда гуьруьшмиш хьана. Ачух суьгьбетрин къайдада тешкилнавай и мярекатдин вахтунда мэрди хабар гайивал, Журналистрин кIвалин патав гвай аллеядиз «Телеф хьайи журналистар рикIел хуьнин сквер» тIвар гуда. «Журналистика дирибашбурун пеше я. И рехъ анжах виридалайни хъсан ксари хкязава», — важиблувал тестикьарун яз, тикрарна ада Артем Боровикан тIварунихъ галай конкурсдин тешкилатчийрин гафар.
Саида Мурадова
