Алатай йисан эхирра Кьурагь райондин администрациядив шад пуд хабар агакьна: дяведин махсус серенжемда командирри чпин вилик эцигзавай кьетIен везифаяр уьтквемвилелди, викIегьвилелди кьилиз акъудзавай Малик Гьажимурадован (КIутIул), Амиль Османован (КьепIир), Эмир Гьайдарован (Арабляр) лайихлувилер Жукован медаль гуналди къейдна. Аскеррив гьукуматдин шабагьар ротадин чIехи пай кIватI  хьанвай чкадал шад гьалара вахкана.

Частунин командирди лагьайвал, Дагъустандай атанвай аскерри, хаталу, четин шартIаризни килиг тавуна, душман тергунин, хуьрер азадунин карда чешне къалурзава.

*  *  *

Жукован медалдиз Хив райондай тир ефрейтор Арсен Мисрихановни лайихлу хьанва. Дяведин махсус серенжемдив эгечIай гьа сифте йикъарилай ада вичин юлдашрихъ галаз Ватандин итижар, хатасузвал жуьрэтлувилелди­ хуьзва. Къизгъин женгер кьиле физвай чкайра ада са шумудра чи аскерар кьиникьикай къутармишна, хи­рер хьайибур саламат чкайриз, санчас­тариз агакьарна.

ВикIегь дагъустанвиди аскервилин буржи намуслувилелди кьилиз акъудзавай гьалдикай Кьиблепатан военный округдин частунин командованиди Дагъустан Рес­пуб­ликадин Кьил Сергей Меликоваз разивилин чар кхьена. Вичин гьисабдай яз, региондин регьберди, вири четинвилериз дурум гана, чешнелувилелди къуллугъзавай ефрейтор Арсенан диде Рагьимат Мисрихановадиз къагьриман рухваяр тербияламишунай сагърай лугьузвай чар рекье туна. Адан кьуд хвани военнияр я. Пуд хци дяведин махсус серенжемда иштиракзава.

*  *  *

Дяведин шартIара са частуна, ротада къуллугъзавай аскерар халис дустариз, стхаяр хьиз, мукьва ксариз элкъвезва. И кардикай чаз редакцияда гуьруьш хьайи махсус серенжемдин иштиракчийрини ихтилатна: дуствилин, стхавилин алакъадиз вафалубур гьар са подразделенида ава.

Гьужумдай 60-бригадада къуллугъзавай Саидни Шамхал гьахьтин хъсан дустар я. Кьведани махсус серенжемда сифте йикъалай иштиракзава. Саид Белиждин поселокдай я. Адал кьве сеферда хирер  хьана. Сагъ хъхьайла, мад вичин бригададиз, юлдашрин патав хъфена. Багърийри, къуншийри, поселокдин 1-нумрадин юкьван школадин муаллимри адал дамахзава.

Шамхал Махачкъаладай я. Адани Саида гьужумдин бригададихъ галаз санал хейлин хуьрер азадна. Са шумудра хаталу дуьшуьшрикни акатна. Абур сифте жергейра аваз гьужумдиз физва эхир. Душмандин ягъунрикни сифте нубатда акатзава. ЯтIани аскерри виликди гьерекатзава, миллетбазриз фир-тефир чка салзава, гвай яракьарни гадарна, абур катдай, есирвиле вугудай чкадал гъизва. Жуьрэтлувилелди, игитвилелди Ватан хуьзвай кьегьалриз баркалла! Аллагьди хуьрай чеб!

Абад Азадов