2025-йисуз Дагъустанда кьезилвилер авай агьалияр пулсуз дарманралди таъминаруниз республикадин бюджетдай 2,3 миллиард манат пул чара ийида. Идакай, РД-дин финансрин министр Шамиль Дабишеван гафарал асаслу яз, ТАСС-ди хабар гузва.

Министрдин гафаралди, цIи винидихъ къейд авур макьсадриз чара авунвай пулдин такьатар гьакъикъатдани хейлин артухарнава. Мисал яз, 2017-йисан делилрив гекъигайтIа, и рекъем саки 2 миллиарддин хкаж хьанва.

Къейд ийин хьи, республикадин бюджетдилай гъейри, кьезилвилер авай дагъустанвияр пулсуз дарманралди таъминарун патал федеральный бюджетдайни 663 миллион манат пул чара ийидайвал я.

Сергей Меликова и месэла вичин гуьзчивилик кутунва. Алатай йисан эхирра кьиле фейи ачух эфирдин сергьятра аваз, ада республикадин здравоохраненидин министерстводиз кьезилвилер авай агьалийрив вахт-вахтунда герек дарманар агакьарунин месэладиз кьетIен фикир гун буйругънай.

«Лезги газет»