25-сентябрдиз Дагъустандин Халкьдин Собрание Республикадин Гьукуматдин Председателдин везифаяр вахтуналди тамамарзаваз хьайи, 40 йисан яшда авай Артем Здунов региондин Гьукуматдин кьилин къуллугъдал тайинарунин меслятдал атана.
Сессияда иштиракзаваз хьайи 77 депутатдикай 75 депутатди Премьер-министрвиле адан кандидатура тестикьарун патал сесер гана. Дагъустандин парламентдихъ вири 93 депутат ава.
“Артем Здунов Россиядин Президентдин кадрийрин резервда сифтегьан чкайрал алайбурукай сад тир. Ам чи регионда кIвалахунин фикирдал атана. Им ада къанажагълудаказ авур кар я. Касди вичин вири уьмуьрда дегишвал туна. Чи кьведанни кIвалахдин тегьер ухшарди я. Чун жуьреба-жуьрбур я, чна гьуьжетарни ийизва, инсанрихъ галаз кIвалахунин къайдайрал гьалтайла, туьш тахьунарни жезва. Амма, за фикирзавайвал, икI хьун Дагъустан патал гзаф итижлуни я, менфятлуни”, — лагьана сессия кьиле физвай чIавуз Дагъустандин регьбер Владимир Васильева. Ада алава хъувурвал, “кадрийриз талукь месэлаяр гьялдай чIавуз я милли, я маса гьич са жуьрединни принципрал гьич садрани амал ийидач”. “Чаз чун гьикI вилик фин лазим ятIа, лап хъсандаказ чизва, амма вири проектар кьилиз акъудунин карда, гьуьрметлу депутатар, куь патайни куьмек герек я”, — лагьана А.Здунова, парламентдихъ элкъвена.
Дагъустандин Кьил Владимир Васильева 25-сентябрдиз Гьукуматдин Председателдин къуллугъдал тайинарун патал республикадин Халкьдин Собранидин вилик Артем Здунован кандидатура эцигна.
9-сентябрдиз, Дагъустандин Кьилин къуллугъдал Владимир Васильев хкягъайдалай гуьгъуьниз, кьиле А.Здунов 7-февралдилай инихъ аваз хьайи республикадин Гьукумат, законодательстводин нормайрал асаслу яз, отставкадиз фена. Гьа са вахтунда В.Васильева гьукуматдиз адан цIийи состав арадал гъидалди вичин хиве авай везифаяр давамарун теклифна.
Дагъустан Республикадин Гьукуматдин Председателдин гьакъиндай
Дагъустан Республикадин Кьилин Указ
1.Дагъустан Республикадин Конституциядин 78-статьядин 1-пунктунал асаслу яз, Здунов Артем Алексеевич Дагъустан Республикадин Гьукуматдин Председателвиле тайинарин.
2.И Указ вичел къул чIугур йикъалай къуватда гьатзава.
Дагъустан Республикадин Кьил В.Васильев
Махачкъала шегьер, 2018-йисан 25-сентябрь, №105
Дагъустандин премьер-министрдин гьакъиндай
Артем Здунов 1978-йисан 18-майдиз Казанда дидедиз хьана. Ада Казандин финансринни экономический институтда кIелна, ам экономикадин илимрин кандидат я. 2010-йисалай ам Татарстандин экономикадин министрдин заместитель тир, 2014-йисалай ам гьа и министерстводин кьиле хьана. 2018-йисан 7-февралдилай А.Здунова Дагъустандин Гьукуматдин Председателдин везифаяр вахтуналди тамамарзавай.
Чи мухбир
