Алатай саласа юкъуз республикадин Гьукуматдин Председатель Артём Здунова региондин парламентдин сессиядал хабар гайивал, Дагъустандин гьукумди “Земский духтур” программадин сергьятра аваз  алай йисуз 230 духтур кIвалахал кьабулун пландик кутунва…

— “Земский духтур” программадин сер­гьят­ра аваз алай йисуз 230 духтур хуьруьн чкай­риз кIвалахал рекье твада, амма им, гьелбетда, лазим кьадар туш, — лагьана А.Зду­нова. — Алай вахтунда чна государстводин программадин бинедаллаз жегьил пешекарар хуьруьн чкайриз кIвалахал фин гьикI ашкъиламишдатIа, гьадакай, абур гележегда къул­лугъ­дин рекьяй хкаж жедай мумкинвилерин гъавурда туникай фикирзава. Идалай гъейри, мумкин я абуруз, ординатурадиз гьахьдайлани, артуханвал жеда. Чун и кIва­лах фи­кир желбдайди ийиз алахъда, — алава хъувуна Гьукуматдин кьили.

Республикадин здравоохраненидин министерстводин  делилралди, регионда винидихъ тIвар кьунвай программадин  иштиракчияр хкядайла, иллаки гуьтIуь хилен пешейрин иесийриз, абурун арадай яз “Тади куьмекдин” духтурриз, неонатологриз, рентгенологриз… артух фикир гана.

Чна виликдай хабар гайивал, “Земский духтур” программадай Дагъустанда 2012-йисалай инихъ саки 900 духтур кIвалахдив эгечIна. Абурукай гьар сада са миллион манатдин кьадарда аваз куьмекдин (подъёмные) пул къачуна. Софинансирование патал республикадин бюджетдай пулар чара авунвачирвиляй, 2014 ва 2015-йисара регионда и программади кIвалахнач.

Региондин здравоохраненидин минис­тер­стводин делилралди, 2017-йисуз “Зем­ский духтур” программадай Дагъустандин хуьрерин чкайра 245 жегьил духтур кIвалах­див эгечIна. И программа кьилиз акъудуни кадрийрин жигьетдай кьитвал алуддай ва хуьрерин агьалийриз медицинадин куьмекдин ери хъсанардай мумкинвал гузва.

Чи мухбир