Суалар ва жавабар

— Буба, накь кимел кьве итим кикIизвай. Абурукай сада муькуьдаз, кьей хва, папахъай кичIеди лугьуз, туьнбуьгьар ийизвай. Ваз чиз, папарихъай кичIе тушир итимар авани?

— Чан хва, итим хьаначиртIа, пабни жедачир, паб хьаначиртIа, — итимни. Гзафбуру папарихъай кичIе итимризни папар лугьузва. Итимдинни папан арада гьамиша гьуьрмет, хатур хьун лазим я. Вуна яб це, за ваз са агьвалат ахъайда.

Садра гзаф кьадар итимар — агьиларни жегьилар — са багъдин къе­рехдал кIватI хьана, гьуьжетриз акъатна. Рахунар дишегьлийрикай­ физвай. Садбуру абур зайиф я, муькуьбуру викIегь я, абуру эрке­карни кваз чпиз муьтIуьгъарзава лугьузвай. Ихтилатрин эхирдай сада папа­хъай кичIе тушир итим бажагьат ава лагьана. Куьрелди, рахунар, гьуьже­тар гзаф хьана. Вирида чеб папарихъай кичIе тушир игитар яз гьисабна.

Абурун арадай яшар хьанвай са камаллу касди лугьуда:

— За гьакъикъат гьихьтинди ятIа тайинарда. Амма куьне вирида авайвал хиве кьада лагьана кьин кьуна кIанда.

Вири рази хьана. Камаллу касди давамарна:

— Папарихъай кичIе тушир итимар — чуьхверин, кичIебур ичин тарарик алад.

Вири мягьтел хьана. Кьин кьунвайвиляй абур гьакI авуниз мажбур хьана: чеб чпиз килигиз, хъвер кваз, сад-садан гуьгъуьналлаз вири ичин тарцик фена. Амма са еке буй-бухах авай къагьриман хьтин итим чуьхверин тарцик акъвазна. Вири тажуб хьана.

— Яда, Къагьриман, ваз, дугъриданни, папахъай кичIе тушни? Валлагь, вун викIегь кас я, — лагьана мягьтел хьанвай ичин тарцик квай итимри.

— Валлагь, дустар, заз папа, эгер зун гзаф итимар алай чкадал акъва­зайтIа, гьатта кIваляй фуни хгудач лагьана тагькимарнавайди я. Гьавиляй захъ маса чара амач, — сир ачухна чуьхверин тарцик акъвазайда.

Рамазан Велибегов