Самурдин там. Вичин кьетIен­вилерал гьалтайла, Урусатда ихьтин надир кьвед лагьай там авач. Ана экъечIзавай тарарикай, тамун “агьалийрикай”, яр-емишдикай, инсанар патал адакай авай хийирдикай “Лезги газетдиз” макъалаяр гзаф акъатна, гьавиляй абурукай мад сеферда ихтилат хъувунин игьтияж авач.

Чаз маса месэладикай рахаз кIанзава: чун, чкадин агьалияр, аниз ял ягъиз физвайбур тамув гьи къайдада эгечIзава? Мукьвара редакциядив агакьнавай шики­лар фикирда кьуртIа (абур макъаладин эхирдай ганва), суалдиз жа­ваб разивализ жедайди туш: писдаказ, са къай­гъу­ни авачиз. Тамун мулкара, къа­расуйрин къе­рехра, чка-чкадал шуьшединни пластмассдин птулкаяр, гьар жуьредин зирзибилар, пакетарни ичIи кьватияр ва маса за­тIар гьалтзава. Бязибуру гьатта яшайишдин амукьаярни кваз, ше­шелра тваз, иниз гъизва. Са гафуналди, там хъуртаз элкъуьрзава.

Сад Аллагьди лезги чилел ихьтин надир там халкьнава, ам­ма бязибуруз адан къадир авач. Мегер, ял ягъиз фейила, жув ацукьай чка михьи хъийиз гьакьван четин яни? Зирзибил, ичIи хьанвай птулкаяр кIватIна, са па­кетда хтуна, хъурт алай чка­дал­ гадариз жезвачни? Ри­кIиз кIан хьайи­тIа, жезва, амма ийизвач. И карди гьахьтин ксарин кьа­цIайвал, жавабдарсузвал къалурзава.

Тамув и къайдада эгечIунал эхир эцигдай вахт алукьнава. Гьар йисуз Самурдин тамуз патарилай вишералди туристар къвезва. Ана авай гьал акурла, абуру вуч лугьуда, чи халкьдиз гьихьтин къимет гуда?

30-июлдиз мергьяматлувилин “ЛЕКИ” фондуни Мегьарамд­хуьруьн райондин администрациядин куьмекдалди Самурдин тама чIехи субботник тешкилда. И мярекатда ашкъи авай гьар са касдивай иштиракиз жеда. Субботникдин иштиракчияр пакаман сятдин 10-даз Самур хуьруьз гьахьзавай къекъуьндал кIватI жеда. Тама михьивилер авурдалай кьулухъ “ЛЕКИ” фондунин векилри иштиракчийриз суфраяр ахъайда ва кIвалахда тафаватлу хьайибуруз савкьатарни гуда.

Чи фикирдалди, Самурдин тама ихьтин субботникар мукьвал-мукьвал кьиле тухуни Лезгистандин и иер пIипI михьидаказ хуьдай мумкинвал гуда. И кардикни неинки са чкадин агьалийри, гьакIни тамуз мугьман жезвай гьар са касди вичин пай кутун герек я. 30-июлдиз чна куьн Самурдин тама вилив хуьда. Ша чна санал чи хайи чил авадан ийин!

Агьмед Магьмудов