Алатай гьафтеда Дагъустандиз 9 мусурман уьлкведин векилар мугьман хьанвай

Палестинадинни Израилдин­ арада дяведин гьерекатар­ га­тIунайдалай инихъ Да­гъустан­ди Газа сектордиз 200 тонндилай артух недай-хъвадай суьрсет, яшайишда герек­ къведай шейэр рекье тунва. Идакай РД-дин Кьил Сергей Меликова алатай гьафтеда республикадиз мугьман хьайи 9 мусурман уьл­кведин векилрихъ галаз кьиле фейи гуьруьшдал лагьана.

Алатай гьафтеда Дагъ­ларин уьлкведиз Туьркиядин, Бангладешдин, Малайзиядин, Пакистан­дин, Къазахстандин, Маври­тания­дин, Ирандин, Иракдин ва Уз­бекис­тандин векилар мугьман хьанвай. Абуру рамазандин вацран сергьят­ра аваз кьиле тухвай диндин мярекатра иштиракна, региондин надир чкайриз сиягьатриз фена.

Сергей Меликова къейд авурвал, дяведин гьерекатар гатIунай йикъалай инихъ дагъустанвийри­ ­Па­лестинадин халкьдиз чпелай алакьдай куьмекар гузва. Палес­тинвийриз рекье тунвай недай-хъвадай суьрсетни республикадин жергедин агьалийрин куьмекдалди кIватIнай. Ада гьакIни Дагъустанди, дяведин гьерекатар себеб яз, катуниз мажбур хьанвай 150 палестинви кьабулнавайдини рикIел хкана.

*  *  *

Лагьана кIанда, къецепатан уьлквейрай атанвай векилрихъ галаз кьиле фейи гуьруьшдал Сергей Меликова Дагъустан яшайишдин жуьреба-жуьре хилерай амадагвилин алакъаяр хуьз гьазур тирдакай хабар гана. Мугьманри АПК-дин, туризмдин, промышленностдин, хуьруьн майишатдин хилериз иллаки итиж авуна. Мисал яз, Бангладешдин векил Камрул Ахсана чпин уьлкве Дагъустанда фармацевтикадин, парчайрин­ хилера инвестициядин проектар­ кьилиз акъудиз гьазур тирдакай малумарна. Туьркиядин векил Тан­жу Бильгичан гафарай малум хьайивал, туьркериз Дагъустандихъ галаз спортдин ва медениятдин хилера амадагвилин алакъаяр мягькемариз кIанзава.

Чи мухбир