Алай йисуз Дагъустандин лагерра 37 агъзурдалай виниз аялри ял яда. Идакай алатай гьафтедин эхирра Махачкъалада РД-дин Гьукуматдин Председателдин заместитель Муслим Телякавован регьбервилик кваз кьиле фейи заседанидал малумарна.

Къейд ийин хьи, цIи республикада 244 лагерь ачух жеда, абурукай 213 мектебра кардик кутада.

Лагерра аялри вахт менфятлудаказ, итижлудаказ акъудун патал махсус программа гьазурнава. Мисал яз, «Отраслевые каникулы» лишандик кваз гьазурнавай проектдин сергьятра аваз аялар цIаяр хкадардайбурун, къутармишдайбурун, духтуррин, муаллимрин ва маса пешейрин сирерихъ галаз танишарда, бязи пешейрай чирвилерни гуда.

Акьалтзавай несилриз тарих, дагъви халкьарин адетар чирунизни кьетIен фикир гудайвал я. Кьилди къачуртIа, абур Дагъустандин жуьреба-жуьре пипIериз сиягьатриз тухуда, мастер-классар къалурда, гуьруьшар тешкилда.

ГьакIни цIинин йисуз лагеррин программайрик Хизандин йисаз, Александр Пушкинан — 225, СтIал Сулейманан — 155, Багьаудин Астемирован 125 йисан юбилейриз талукьарнавай мярекатарни кутадайвал я.

М. Телякавова алава хъувурвал, Украинада кьиле физвай махсус серенжемдин иштиракчийрин аялрин патахъай иллаки чIехи къайгъударвал ийида. Мисал яз, абур лагерриз нубат авачиз кьабулда, абуруз ва яшайишдин четин шартIара авай хизанрай тир аялриз лагерриз фин патал пулсуз путевкаяр чара ийида.

Гегьеншдиз РД-дин Гьукуматдин сайтдай кIелиз жеда.

Чи  мухбир