(Эвел — 2024-йисан 14-15-нумрайра)
Пайгъамбарди (Аллагьдин салават ва салам хьуй вичиз) мад са гьадисда лагьанва (мана):
«Къуръан кIелун ва ам масабуруз чирун патал инсанар Аллагьдин КIвалерикай (мискIинрикай) гьар гьи КIвале кIватI хьайитIани, Аллагьди абур Вичин регьимдалди элкъуьрна кьазва, абурун патав малаикар эвичIзава ва Аллагьди а инсанрин тIварар малаикрин арада кьазва» (Муслим).
И гьадисдай чир жезвайвал, вичиз Къуръан кIелиз чирзавай ва масабуруз Къуръан чирун патал тарс гузвай касдихъ гзаф лайихлувилер ава, вучиз лагьайтIа, Къуръан вири чирвилерин асул я! Эгер инсанди «фикъгь» (Шариат) ва я «акъида» (инандирмишвилер), я тахьайтIа гьадисар чирзаватIа, абур вири Къуръанда аваз атанва ва Къуръандал хквезва! Гьавиляй, вуч ийиз ва вуч лугьуз хьайитIани, Къуръандай ва Суннадай тир Шариатдин делил лазим я!
Пайгъамбарди (Аллагьдин салават ва салам хьуй вичиз) маса гьадисда лагьанва (мана):
«Виридалайни хъсанбур квекай, вичиз Къуръан чирна, ам масадаз чирайди я».
ГьакIни, нин аялри Къуръан кIелиз чирайтIа, а аялрин диде-бубадал Къияматдин Юкъуз Аллагь-Таалади пачагьри алукIдай къизилдин таж алукIда.
Умар халифади (Аллагь рази хьурай вичелай) агакьарнавайвал, Пайгъамбарди (Аллагьдин салават ва салам хьуй вичиз) лагьана (мана): «Гьакъикъатда Аллагьди и Къуръандалди хкажда (дережа) бязи халкьарин ва агъузарда (дережа) маса халкьарин» (Муслим).
Абу Ума́магь аль-Ба́гьилий асгьабди (Аллагь рази хьурай вичелай) хабар гузвайвал, Пайгъамбарди (Аллагьдин салават ва салам хьуй вичиз) лагьана (мана): «Куьне Къуръан кIела, дугъриданни, Къияматдин Юкъуз ам къведа шафагьатчи яз адан сагьибриз» (Муслим).
Пуд лагьай халифа Усма́н ибн Аффа́на (Аллагь рази хьурай вичелай) лугьузва: «Эгер чи рикIер михьи хьанайтIа, чун тух жедачир Аллагьдин Каламдикай». Яни, эгер рикIер михьи тиртIа, инсанди экуьнахъни, нянихъни Къуръан кIелдай (адан манайрин винел фикир ийиз) ва Къуръанди адан рикIе авай шейэр (шаклувилер, азарар, чIуру ниятар) сагъардай! Къуръан хуравай шейэриз сагъарун ва дарман я!
Ямин Мегьамедов, диндин алим
