23-февраль — Ватан хуьзвайбурун югъ
Ватан хуьн, адаз къуллугъ авун гьар са агьалидин пак буржи я. И муракаб ва баркаллу кар аскервилин партал алайбуру Россиядин Армиядин кьушунра дирибашвилелди кьилизни акъудзава. Гьавиляй чна гьар йисан 23-февралдиз Ватандин къаравулда акъвазнавай кьегьалар рикIел гъизва, абурун гьуьрметдай хуш келимаяр лугьузва, абурун кьегьалвилерикай очеркар, зарисовкаяр, макъалаяр кхьизва.
Четин, амма гьуьрметлу пеше — Ватандиз вафалудаказ къуллугъ авунин, уьлкведин милли итижар хуьнин, адан оборонадин бажарагълувал мягькемарунин, чи ватандашриз уьмуьрдин ислягь, къулай, Россия дурумлудаказ вилик финин шартIар яратмишунин пеше хкянавай ксар тебрикзава. Гьа са вахтунда лугьуз кIанзава, агъур имтигьанрин вири йисара хайи чил душмандикай хвейи гзаф несилрин аскеррин кьегьалвилер халкьдин рикIе гьамишалугъ амукьдайдахъни инанмиш я.
Алай вахтундани чи уьлкведин Яракьлу Къуватар дуьньяда ислягьвал хуьнин, ядерный дяведин вилик пад кьунин, международный террориствилин организацийриз акси женгинин вилик квай сенгеррал ала. Абуру Мукьвал тир РагъэкъечIдай пата, Сирияда, СНГ-дин бязи уьлквейра ва маса чкайрани важиблу месэлаяр гьялунин карда активдаказ иштиракзава.
Лугьун лазим я хьи, Ватан хуьнин буржидиз вафалу рухваяр, рушар чи уьлкведа вири девирра хьана, гилани гзаф ава. И кар абуру Ватандин ЧIехи дяведин мусибатдин йисара, фашистрин кьушунри чукIурай, барбатIай хуьрер, шегьерар, карханаяр, майишатар кIвачел ахкьалдардайлани, пятилеткайрин планар кьилиз акъуддайлани, стха уьлквейрин тIа-лабуналди интернационалиствилин буржи тамамардайлани, 1999-йисуз Дагъларин уьлкведал яракьламиш хьанвай бандитрин дестейри вегьейлани, уьтквемвилелди кьилиз акъудна. Абурун арада лезги халкьдин векиларни авай. Къенин юкъузни Россиядин Армиядин жуьреба-жуьре кьушунра, аскеррилай, морякрилай гатIунна, генералрал, сад лагьай рангдин капитанрал кьван къведалди чи ватанэгьлийри вафалувилелди, кьегьалвилелди къуллугъзава, чпин везифаяр жавабдарвал гьисс авуналди тамамарзава.
Алатай гьафтеда уьлкведа ва чи республикадани Афгъанистандай советрин кьушунар ахкъудай югъ къейдна. Лугьун лазим я хьи, “афгъанвийри” чеб Ватандиз вафалу тирди кардалди субутна. Къени Дагъустандин “афгъанвийри” республикадин общественный кIвалахра чеб алай чкадикай хабар гузва. Акьалтзавай несилдиз ватанпересвилин тербия гунин кардик аквадай хьтин пай кутазва. Чна ахьтин рухвайрал дамахзава. Къуллугъдин, кеспидин везифаяр намуслувилелди, гьакъисагъвилелди кьилиз акъудай гьар са кьегьалдин крар, игитвилер веледриз, акьалтазвай несилриз хъсан чешне я.
Къенин жегьил аскерри армиядин жергейра дирибашвал, жуьрэтлувал къалуруналди, Ватандиз вафалувилелди къуллугъ авуналди, чпин везифа тарифлудаказ тамамарзава. Абуруз аферин! Чна виридаз Ватан хуьзвайбурун югъ тебрикзава. Къуй вири дуьньяда ислягьвал хьурай!
Хийир Эмиров
