19-февралдиз “Лезги газетдин” редакцияди Каспийскда, Республикадин образованидин центрада, лезги чIалай вад лагьай сеферда олимпиада кьиле тухвана. Ана Махачкъала ва Каспийск шегьеррин мектебрин 8-классра кIел­за­вай аялри иштиракна. Хайи чIалан Международный югъ къейд авунин сер­гьятра аваз тухвай мярекат машгьур алим-лингвист Гьажибег Гьажибегован 120 йис тамам хьуниз талукьарнавай.

Олимпиададин тапшуругърин арада чIалайни литературадай 12 тест, гафарин составрин разбор ва тест-диктант авай. КIвалахриз къимет “Лезги газетдин” кьилин редактор Мегьамед Ибрагьимовани адан заместитель Куругъли Ферзалиева гана.

Нетижада 1-чкадиз — Махачкъаладин 9-нумрадин лицейдин ученица Амина Шагьмирзоева (муаллим — Алиса Рамазанова), 2-чкадиз — Махачкъаладин 38-нумрадин гимназиядин ученица Наиля Агъаларова (муаллим — Алимат Баламирзоева) ва 3-чкадиз Каспийск шегьер­дин 15-нумрадин мектебдин ученица Къизил Агъафендиева (муаллим — Гуля Алисултанова) лайихлу хьана. Абур 5, 3, 2 агъзур манатдин кьадарда аваз пулдин пишкешриз, дипломриз ва “Лезги чIал чирин” ктабриз лайихлу хьана. Дипломар абурун муаллимривни вахкана.

Мегьамед Ибрагьимова къейд авурвал, газетдин редакцияди гьар йисуз тешкилзавай и олимпиада йисалай-суз машгьур жезва. И кар ана иштиракзавайбурун кьадар къвердавай артух хьунини тестикьарзава. Мисал яз, алатай йисуз мярекатда 11 касди иштиракнайтIа, цIи абурун кьадар 19-дав агакьнавай.

РикIел хкин, редакцияди олимпиада 2018-йисалай кьиле тухузва.

Агьмед  Магьмудов